BAKI, AzerVoice , Nərmin Ağayeva
ABŞ rəhbərliyi 55 milyon vizanı yenidən nəzərdən keçirəcək.
AzerVoice xəbər verir ki, Donald Tramp administrasiyası immiqrasiya siyasətini sərtləşdirərək, etibarlı vizası olan milyonlarla əcnəbinin sənədlərinin yenidən yoxlanılacağını açıqlayıb.
ABŞ Dövlət Departamentinin məlumatına görə, yoxlamalar viza müddətini keçmə, cinayət törətmə, ictimai təhlükəsizliyi təhdid etmə, terror fəaliyyəti ilə məşğul olma və ya terror təşkilatına dəstək vermə kimi halları əhatə edəcək. Əgər pozuntular aşkarlanarsa, vizalar ləğv ediləcək, ölkədə olan şəxslər isə deportasiya oluna biləcək. Proses zamanı viza sahiblərinin öz ölkələrindəki təhlükəsizlik və immiqrasiya qeydləri, eləcə də sosial media fəaliyyətləri də nəzərdən keçiriləcək.
Məsələ kommersiya yük maşını sürücülərinə də təsir edib. Dövlət katibi Marko Rubio sosial şəbəkədəki açıqlamasında əcnəbi sürücülərə iş vizalarının dayandırıldığını bildirərək, bu artımın “Amerikalı sürücülərin dolanışığına zərər verdiyini” vurğulayıb. Tramp administrasiyası daha əvvəl də ingilis dili bilməyən sürücülərlə bağlı məhdudiyyətləri sərtləşdirmişdi.
Eyni zamanda, Pew Araşdırma Mərkəzinin məlumatına görə, onilliklər ərzində ilk dəfə ABŞ-ı tərk edən immiqrantların sayı gələnləri üstələyib. Cari ilin ilk yarısında ölkədə yaşayan əcnəbi mənşəli əhalinin sayı 1,5 milyon azalıb. Rəsmilər bunu “dövlət xidmətlərinə təzyiqin azalması və iş bazarının yaxşılaşması” kimi qiymətləndiriblər.
Tramp Vaşinqtonda təhlükəsizlik tədbirlərinə nəzarət etmək üçün polis idarəsinə baş çəkib, daha əvvəl isə şəhərə 800 Milli Qvardiyaçı yerləşdirmişdi. Prezidentin bu addımı paytaxt meri tərəfindən “təhlükəsizlik vəziyyəti ilə qeyri-mütənasib” hesab olunub.
Bundan başqa, FTB agentləri Trampın keçmiş milli təhlükəsizlik müşaviri Con Boltonun evində axtarış aparıb. Son aylarda Trampı tənqid edən açıqlamalar verən Boltonla bağlı rəsmi səbəb açıqlanmasa da, FTB direktoru “heç kimin qanundan üstün olmadığını” vurğulayıb.
Qeyd edək ki, Tramp administrasiyası vəzifəyə gəldiyi ilk gündən bəri qeyri-qanuni immiqrasiya ilə mübarizəni prioritet elan edib və bu istiqamətdə bir sıra sərt addımlar atıb.
