BAKI, AzerVoice, Səməd Əyyubov
Rusiya Ukrayna münaqişəsinin həlli üzrə aparılan danışıqlarda çeviklik nümayiş etdirir, ABŞ isə prosesi vicdanla aparır.
AzerVoice xəbər verir ki, bu sözləri ABŞ-ın vitse-prezidenti Cey Di Vens "NBC News" telekanalına müsahibəsində səsləndirib.
Ondan “Rusiya ABŞ-ı aldatmırmı?” sualı soruşulduqda Vens belə cavab verib: “Xeyr, qətiyyən belə deyil. Mən hesab edirəm ki, Rusiya prezident Donald Trampa əhəmiyyətli güzəştlərə gedib. Əslində, üç yarım ildən sonra ilk dəfə olaraq onlar əsas tələblərində çeviklik göstəriblər”.
Vens əlavə edib ki, ABŞ danışıqlarda vicdanla iştirak edir. “Biz həm ruslarla, həm də ukraynalılarla mümkün qədər çox danışıqlar aparmağa çalışırıq ki, münaqişəyə son qoyulsun” - deyə, o vurğulayıb.
Vitse-prezident onu da qeyd edib ki, ABŞ gələcəkdə Rusiyaya qarşı sanksiyaların tətbiqini istisna etmir, lakin bu qərarlar fərdi şəkildə qəbul olunacaq.
“Sanksiyalar gündəlikdən çıxarılmayıb, lakin biz hər qərarı ayrıca verəcəyik” - deyə, Vens bildirib.
Onun sözlərinə görə, ABŞ administrasiyası bundan əvvəl Rusiyanın əsas tərəfdaşlarından biri olan Hindistana qarşı gömrük rüsumlarını artırıb.
“Bizim düşündüyümüz budur ki, Rusiyaya düzgün şəkildə təzyiq göstərək və onu danışıqlar masasına oturmağa məcbur edək. Siz dediniz ki, sanksiyalar atəşkəsə gətirib çıxarmayacaq. Məncə, bu, açıq-aydın doğrudur” – deyə, Vens əlavə edib.
Xatırladaq ki, avqustun 18-də Ağ Evdə ABŞ prezidenti Donald Tramp, Ukrayna prezidenti Volodimir Zelenski və bir sıra Avropa liderlərinin iştirakı ilə danışıqlar aparılıb.
Bundan əlavə, Alyaskanın Ankoric şəhərində yerləşən “Elmendorf-Riçardson” hərbi bazasında Tramp və Putin arasında məhdud formatda görüş keçirilib. Görüşdə Rusiya tərəfini Prezidentin köməkçisi Yuri Uşakov və xarici işlər naziri Sergey Lavrov, ABŞ tərəfini isə dövlət katibi Marko Rubio və Prezidentin xüsusi nümayəndəsi Stiven Uitkoff təmsil edib. Liderlər əvvəlcə qısa söhbət aparıb, daha sonra “üçə-üç” formatında əsas müzakirələrə keçiblər. Görüşdən sonra dövlət başçıları birgə mətbuat konfransı keçiriblər.
Aavqustun 19-da isə, Ukrayna ilə bağlı iki mühüm görüş keçirilib – “istəklilər koalisiyası”nın liderlərinin videokonfransı və Avropa İttifaqının onlayn sammiti.
Hər iki tədbirdə Alyaskada baş tutan ABŞ–Rusiya sammitinin nəticələri, ABŞ prezidenti Donald Trampın Ukrayna prezidenti Volodimir Zelenski və bir sıra Avropa liderləri ilə apardığı danışıqlar, həmçinin döyüş əməliyyatları başa çatdıqdan sonra Ukraynaya veriləcək təhlükəsizlik təminatları müzakirə olunub.
