BAKI, AzerVoice, Səməd Əyyubov
Venesuela prezidenti müavini və neft naziri Delsi Rodriges ABŞ-ı ölkəsinin sahillərindən və ərazisindən uzaq durmağa çağırıb.
AzerVoice xəbər verir ki, Karabobo əyalətində çıxış edən Rodriges ABŞ hökumətini Karib dənizinə hərbi gəmilər göndərməklə düşmənçilik fəaliyyəti göstərməkdə ittiham edib.
“Öz problemlərinizi həll edin və sahillərimizdən, torpaqlarımızdan uzaq durun. Əgər ABŞ ölkəmizə hücum etməyə cəhd edərsə, Venesuela onların ən böyük kabusuna çevriləcək” – deyə Rodriges Vaşinqton rəhbərliyinə səslənib.
O, ABŞ-ın Venesuelanın zəngin enerji ehtiyatlarına əl qoymaq niyyətində olduğunu iddia edərək əlavə edib: “Onlar anlamalıdırlar ki, ABŞ təbiəti istismar edən imperialist və ekspansionist bir dövlətdir. Digər ölkələrə öz müstəmləkəsi kimi baxır. Halbuki bu gün özü sosial, iqtisadi və siyasi böhran içindədir.”
Rodriges həmçinin ABŞ-ın Venesuela rəhbərliyini “narko-terrorçu dövlət” adlandırmasını rədd edib: “Simon Bolivar və Hüqo Çavesin nəcib xalqını narkotik qaçaqmalçılığı ilə ittiham etmək böyük saxtakarlıq və əxlaqsızlıqdır. Bu, tarixin ən böyük yalan və böhtanlarından biridir.”
Xatırladaq ki, ABŞ prezidenti Donald Tramp daha əvvəl imzaladığı sərəncamla Latın Amerikası narkotik kartellərinə qarşı mübarizə adı altında ordunun daha geniş istifadəsinə icazə vermişdi. Avqustun 8-də isə ABŞ hökuməti Venesuela prezidenti Nikolas Maduro haqqında məlumat verilməsi müqabilində mükafatı 25 milyon dollardan 50 milyon dollara qaldırmışdı.
Vaşinqton administrasiyası Maduronun on ildən artıq müddətdə ABŞ tərəfindən narkotik qaçaqmalçılığına görə məsul tutulan “Cartel de los Soles”in rəhbəri olduğunu iddia edir. ABŞ Maliyyə Nazirliyi iyulun 25-də həmin karteli “Xüsusi Müəyyənləşdirilmiş Qlobal Terrorçu” təşkilat kimi tanımışdı. Trampın göstərişi ilə Karib hövzəsinə Venesuela sahillərinə bir sualtı qayıq və yeddi hərbi gəmidən ibarət donanmanın göndərildiyi açıqlanmışdı.
