BAKI,AzerVoice, Fərid Mikayılov
NATO, Rusiyaya məxsus hərbi təyyarələrin Estoniyanın hava məkanını pozması ilə bağlı kəskin reaksiya verib.
AzerVoice xəbər verir ki, alyans, bunun Moskvanın “getdikcə artan məsuliyyətsiz davranışlarının” bir nümunəsi olduğunu bildirib.
NATO 19 sentyabrda baş verən insidentdən sonra fövqəladə qaydada səfirlər səviyyəsində iclas keçirib. İclasda Avropa Müttəfiq Qüvvələrinin Ali Baş Komandanı (SACEUR) məlumat verərək üç silahlı Rusiya MiG-31 qırıcı təyyarəsinin Estoniya hava məkanına daxil olduğunu və orada on dəqiqədən çox qaldığını açıqlayıb.
NATO-nun yazılı bəyanatında bildirilib ki, alyansın reaksiyası sürətli və qəti olub – müttəfiq təyyarələr dərhal havaya qalxaraq rus qırıcılarını Estoniya hava məkanından uzaqlaşdırıb.
Bəyanatda bu insidentin Rusiyanın “təxribat xarakterli və təhlükəli hərəkətlərinin” davamı olduğu qeyd olunub. Son iki həftədə NATO artıq ikinci dəfə alyansın 4-cü maddəsi əsasında toplandığı vurğulanıb.
Eyni zamanda Finlandiya, Latviya, Litva, Norveç və Rumıniyanın da yaxın zamanda oxşar hava məkanı pozuntuları ilə üzləşdiyi xatırladılıb və bütün müttəfiqlərlə tam həmrəylik ifadə olunub.
NATO bəyan edib ki, Rusiyanın bu addımları yanlış hesablamalara yol aça bilər və dərhal dayandırılmalıdır. Alyansın cavablarının güclü olacağı, xüsusən hava hücumundan müdafiə sahəsində çəkindirici və müdafiə imkanlarının artırılacağı vurğulanıb.
“Rusiyanın heç bir şübhəsi olmamalıdır. NATO və müttəfiqlər beynəlxalq hüquq çərçivəsində özümüzü qorumaq və hər istiqamətdən gələ biləcək təhdidlərin qarşısını almaq üçün bütün zəruri hərbi və qeyri-hərbi vasitələrdən istifadə edəcək”, – deyə bəyanatda qeyd olunub.
