İraqın paytaxtı Bağdadda yanacaqdoldurma məntəqələrinin qarşısında uzun növbələr yaranıb. Buna səbəb Yaxın Şərqdə davam edən müharibənin yaratdığı idxal problemləri fonunda ölkədə benzin təchizatının azalmasıdır.

ArabAZ xəbər verir ki, İraq OPEK-in ikinci ən böyük neft istehsalçısı olsa da, yerli neft emalı zavodları daxili tələbatı tam qarşılamaq üçün kifayət qədər benzin istehsal etmir. Buna görə ölkə neft məhsullarının idxalından asılıdır.

Son həftələrdə regional qarşıdurmaların davam etməsi fonunda Bağdadda və digər əyalətlərdə, xüsusilə dövlətə məxsus yanacaqdoldurma məntəqələrinin qarşısında növbələr bir neçə gündən bir yenidən yaranır.

İraqın Neft Nazirliyinin məlumatına görə, ölkədə benzinin orta gündəlik istehlakı 33 milyon litr təşkil edir. Qıtlıqla bağlı narahatlıq yarandıqda isə tələbat 38 milyon litrə qədər yüksəlir.

Nazirlik regiondakı hadisələrin və davam edən münaqişənin tanker daşımaları üçün logistika problemləri yaratdığını və gəmilərin İraq limanlarına çatmasının gecikdiyini bildirib. Vətəndaşlara yalnız ehtiyacları qədər yanacaq almaq və yanacaqdoldurma məntəqələrində sıxlıq yaratmamaq çağırışı edilib.

##/91142##

İraqın Neft naziri Bəssəm Məhəmməd Xudeyr yaranmış vəziyyəti “müvəqqəti benzin qıtlığı” adlandırıb və təchizatın sabitləşdirilməsi üçün yeni yanacaq partiyalarının yaxın zamanda ölkəyə çatacağını bildirib.

İraqın neft sektoruna regiondakı ABŞ-İran qarşıdurması da ciddi təsir göstərib. Münaqişə strateji əhəmiyyət daşıyan Hörmüz boğazından neft daşımalarının məhdudlaşmasına səbəb olub.

Neft ixracından yüksək dərəcədə asılı olan İraqın büdcə gəlirlərinin təxminən 90 faizi neft satışından formalaşır. Müharibədən əvvəl ölkə gündəlik təxminən 4 milyon barel neft hasil edir, bunun orta hesabla 3,4 milyon barelini əsasən Hörmüz boğazı vasitəsilə ixrac edirdi.

İraqın Neft Nazirliyinin məlumatına görə, ixracın əhəmiyyətli dərəcədə azalmasından sonra avqust ayında gündəlik neft ixracı 2,2 milyon bareldən çox olub.