BAKI, AzerVoice, Nailə Babazadə
ABŞ Prezidenti Donald Tramp, film istehsalının digər ölkələr tərəfindən ABŞ-dan “oğurlandığını” bildirərək, ölkə xaricində istehsal olunan bütün filmlərə 100 faiz rüsum tətbiq edəcəyini açıqlayıb.
AzerVoice xəbər verir ki, Tramp, ABŞ mərkəzli Truth Social hesabında məsələ ilə bağlı paylaşım edib.
Film istehsalının digər ölkələr tərəfindən "bir körpənin əlindən konfetinin alınması kimi" ABŞ-dan “oğurlandığını” vurğulayan Tramp, “Kaliforniya, zəif və bacarıqsız qubernatoru ilə, xüsusilə ağır zərbə aldı” ifadəsini işlədib.
“Buna görə də, uzun müddətdir davam edən və bir növ sonsuz hala gəlmiş bu problemi həll etmək üçün ABŞ xaricində çəkilən bütün filmlərə 100 faiz rüsum tətbiq edəcəyəm,” – deyə Tramp qeyd edib.
ABŞ Prezidenti Tramp may ayında Ticarət Nazirliyi və ABŞ Ticarət Nümayəndəliyinə xarici ölkələrdə istehsal olunan və ölkəyə gətirilən bütün filmlərə 100 faiz gömrük vergisi tətbiq etmə prosesinə başlamaq səlahiyyəti vermişdi.
