BAKI, AzerVoice
İsrailin Baş naziri Benyamin Netanyahu ABŞ Prezidenti Donald Tramp ilə dünən Ağ Evdə keçirdiyi görüşdən sonra açıqlama verib. Baş nazir özünün “Telegram” hesabında yayımladığı videomüraciətdə deyib: “Xeyr, qətiyyən. Bu, razılaşmada yer almır. Biz tam aydın şəkildə bildirmişik ki, Fələstin dövlətinə qəti surətdə qarşıyıq.”
O əlavə edib ki, İsrail bütün girovlarını sağ-salamat geri qaytaracaq.
“Biz bütün əsirlərimizi geri alacağıq, ordu isə Qəzzanın böyük əksəriyyətində mövcudluğunu davam etdirəcək.”-deyə o yazıb.
Xatırladaq ki, Donald Tramp bazar ertəsi Qəzzada müharibəni dayandırmaq planını təqdim edib. Planın əsas bəndlərinə İsrail ordusunun mərhələli şəkildə Qəzzadan çıxması, HƏMASın silahsızlaşdırılması və regionda təhlükəsizliyin təmin olunması daxildir. Netanyahu bu planın şərtlərini qəbul etdiyini açıqlayıb.
Tramp planı “Yaxın Şərqdə sülh üçün tarixi gün” adlandırıb və onun həyata keçirilməsini İbrahim razılaşmalarının genişləndirilməsi ilə əlaqələndirib. O, Səudiyyə Ərəbistanı, Qətər, BƏƏ, Misir, İordaniya, Türkiyə, eləcə də İndoneziya və Pakistanın göstərdiyi dəstəyi yüksək qiymətləndirib. ABŞ lideri bu dövlətlərə ölüm və dağıntılara son qoymaq, bölgədə təhlükəsizlik və rifah üçün yeni bir mərhələ başlatmaq istiqamətində verdikləri dəstəyə görə təşəkkür edib.
