BAKI,AzerVoice, Fərid Mikayılov
İranın vitse-prezidenti Məhəmməd Rza Arif son hadisələrin ölkənin gücünü göstərdiyini vurğulayaraq, düşmənlərin hər hansı bir hücumda “atəşkəs üçün yalvarmalı olacaqlarını” öyrəndiklərini bildirib.
AzerVoice xəbər verir ki, Arif çıxışında 12 günlük müharibənin İranda “milli həmrəylik və sosial kapital” yaratdığını qeyd edib.
“Biz müharibə istəyən deyilik və heç vaxt savaş başlatmamışıq, amma bu gün düşmən öyrənib ki, əgər hücum edəcəksə, atəşkəs üçün yalvarmalı və mesajlar göndərməlidir” – deyə o bildirib.
Vitse-prezident əlavə edib ki, BMT baş katibi ilə xarici bir ölkədə görüş zamanı baş katib 12 günlük müharibədən sonra İran sisteminin və hökumətinin çöküş ehtimalının sona çatdığını etiraf edib.
Arif vurğulayıb ki, İranın düşmənləri 1979-cu il İnqilabından bəri İslam Respublikasını məhv etməyə çalışıblar, lakin hər qarşıdurma sistemin sabitliyini və birliyini yalnız daha da gücləndirib.
Vitse-prezident həmçinin sanksiyalar altında inkişaf etdirilmiş İranın raket imkanlarının müharibə zamanı Sionist rejimə “qəti cavab” verdiyini qeyd edib.
