BAKI, AzerVoice, Nailə Babazadə
İtaliyada hakim partiya burka və niqabı bütün ictimai yerlərdə qadağan etmək üçün qanun layihəsi təqdim edib. Qadağanı pozanlara 300 ilə 3 min avro arasında cərimə tətbiq olunacaq. Bu qadağa artıq Lombardiya bölgəsində qüvvədə idi.
AzerVoice xəbər verir ki, İtaliyada hakimiyyətdə olan İtaliyanın Qardaşları Partiyası, "İslamla əlaqəli mədəni parçalanma ilə mübarizə" adı altında hazırlanmış geniş qanun layihəsinin bir hissəsi kimi, ictimai yerlərdə burka və niqabın qadağan edilməsini nəzərdə tutan qanun layihəsini təqdim edib.
Baş nazir Giorgia Meloninin partiyasından olan millət vəkilləri tərəfindən parlamentə təqdim olunan layihə, ölkə üzrə bütün ictimai yerlərdə — məktəblərdə, universitetlərdə, mağazalarda və ofislərdə — üzü örtən geyimlərin qadağan olunmasını nəzərdə tutur. Qanunu pozanlara 300 ilə 3 min avro arasında cərimə tətbiq olunacaq. Layihənin mətnində qanunun "dini radikallaşma və dini motivli nifrətlə mübarizə məqsədi daşıdığı" qeyd olunub.
Fransa 2011-ci ildə ictimai yerlərdə niqab geyinməyi ümumilikdə qadağan edən ilk Avropa ölkəsi olmuşdu. Daha sonra bir sıra digər Avropa ölkələri də eyni yolu izləyib.
Avropa İnsan Haqları Məhkəməsi (AİHM) 2017-ci ildə bu cür qadağaları təsdiqləmiş və "dövlətlərin cəmiyyətdə birgəyaşayışı qorumaq məqsədilə bu tip geyimləri məhdudlaşdıra biləcəyinə" qərar vermişdi.
İtaliyanın şimalındakı Lombardiya bölgəsində artıq 2015-ci ilin sonlarından etibarən dövlət binalarına və xəstəxanalara üzü örtülü şəkildə daxil olmağa qadağa qoyulmuşdu. Bu kimi bölgələrdə artıq müəyyən məhdudiyyətlər mövcuddur.
Qanun layihəsi yalnız üz örtüklərini deyil, həm də İtaliya dövləti ilə rəsmi müqaviləsi olmayan dini təşkilatlara yeni maliyyə şəffaflığı tələbləri də gətirir.
Hazırda heç bir İslam təşkilatının bu cür rəsmi müqaviləsi yoxdur, bu da İslam dinini İtaliyada rəsmi tanınmış 13 digər dini qrupdan fərqli olaraq, rəsmi tanınmadan məhrum edir.
Qeyd olunan qanun layihəsi hazırda parlamentin bir komissiyasında araşdırılır və bu yeni qanun təklifinin digər qanunlarla birləşdirilib-birləşdirilməyəcəyi hələ məlum deyil. Koalisiyanın parlamentdə güclü çoxluğa sahib olması isə bu cür qanunların dəstək ala biləcəyini göstərir.
