BAKI, AzerVoice, Nailə Babazadə
Əfqanıstan hökumətinin, ölkənin Spin Boldak bölgəsi ilə Pakistanın Çaman bölgəsində baş verən silahlı toqquşmaların ardından atəşkəs tələb etdiyi iddia olunub.
AzerVoice xəbər verir ki, Pakistanın Kəraçi şəhərində yerləşən Geo News telekanalına danışan təhlükəsizlik rəsmiləri, Pakistan ordusunun Əfqan qüvvələrinə məxsus çoxsaylı post və tankı məhv etdiyini bildiriblər. Məlumata görə, son günlərdə baş verən gərgin döyüşlər nəticəsində Spin Boldak və Çaman bölgələrində ciddi itkilər qeydə alınıb.
Rəsmilər, toqquşmaların ardından Əfqanıstan hökumətinin rəsmi olaraq atəşkəs istədiyini iddia ediblər.
Pakistanlı rəsmilər Əfqanıstan tərəfindən sosial şəbəkələrdə Pakistan ordusuna aid silah və hərbi texnikanın ələ keçirildiyinə dair yayılan görüntülərin isə saxta və əsassız olduğunu bəyan ediblər.
Pakistan Ordusunun İctimaiyyətlə Əlaqələr İdarəsi (ISPR) tərəfindən yayılan rəsmi açıqlamada, Əfqanistanın Hayber Paxtunxva bölgəsindəki sərhəd postlarına hücum etdiyi qeyd olunub.
Həmin hücumlara cavab olaraq 6 tankın məhv edildiyi, həmçinin 25–30 əfqan hərbçisinin zərərsizləşdirildiyinin təxmin edildiyi vurğulanıb.
ISPR tərəfindən yayımlanan digər açıqlamada isə Hindistan ordusunun Bixar və Qərbi Benqal ştatlarında keçiriləcək seçkilər öncəsi təxribatçı bəyanatlar verdiyi bildirilib. Açıqlamada bu cür bəyanatların regional sülh və sabitlik üçün ciddi təhlükə yaratdığı ifadə olunub.
“Dünya artıq Hindistanı sərhədyanı terrorizmin əsl siması və regional qeyri-sabitliyin mərkəzi kimi görür,” – deyə Pakistan tərəfi bildirib.
Açıqlamada Hindistan hökumətinə Pakistanın öz torpaqlarını müdafiə etməyə hazır və qərarlı olduğu xatırladılıb və əlavə edilib:
“İstənilən təcavüz aktı, gələcək nəsillər tərəfindən xatırlanacaq sürətli, qətiyyətli və güclü bir cavabla qarşılanacaq.”
Pakistan hökuməti, Talibanın 2021-ci ildə Əfqanıstanda hakimiyyəti ələ keçirməsindən bu yana, Kabil rəhbərliyindən Pakistan Talibanına (TTP) qarşı ciddi tədbirlər görülməsini tələb edir.
İslamabad TTP-ni terror təşkilatı kimi tanıyır və onun Pakistan ərazisində çoxsaylı hücumlar həyata keçirdiyini bildirir. Hökumət, TTP-nin Əfqanıstanda yerləşdiyini, lakin Kabil rəhbərliyinin bu qrupa qarşı tədbir görmədiyini vurğulayır.
Əfqanıstan tərəfi isə TTP-nin öz ərazilərində fəaliyyət göstərmədiyini iddia edir.
Pakistan Talibanı, Əfqanıstan və Pakistan arasında yerləşən və ingilislər dövründə çəkilmiş “Durand xətti” ətrafındakı Peştun tayfa bölgələrini aktiv şəkildə istifadə edir.
