BAKI,AzerVoice, Fərid Mikayılov
Yunanıstan mətbuatı İsrailin arxipelaq adalarında istifadə oluna biləcək “killer drones” tipli insansız hava vasitələri (PUA) də daxil olmaqla hava müdafiə sistemləri təklif etdiyini yazıb.
AzerVoice xəbər verir ki, “Kathimerini” qəzetinin məlumatına görə, təklif hazırda Yunanıstan Silahlı Qüvvələri tərəfindən qiymətləndirilir.
Məlumata əsasən, İsrail uzun müddətdir müzakirə olunan “Spyder All in One” hava müdafiə sisteminə əlavə olaraq, adaların mürəkkəb coğrafi quruluşuna uyğun yeni sistemlər də təklif edib.
Bu çərçivədə, həm PUA-lara qarşı müdafiə məqsədilə istifadə oluna bilən lazer sistemləri, həm də batareya ilə işləyən, məlumat toplaya bilən və potensial təhlükələrə qarşı operativ hərəkətə keçə bilən “killer drones” tipli pilotsuz uçuş aparatlarının təqdim olunduğu bildirilib.
Qəzetin yazdığına görə, İsrailli şirkətlər tərəfindən təklif olunan həmin dronlar, məskunlaşma olmayan kiçik adalarda belə rahatlıqla yerləşdirilə bilər. Yunanıstan Silahlı Qüvvələrinin bu sistemləri hərtərəfli şəkildə qiymətləndirdiyi qeyd olunur.
Avropa İttifaqının 2027-ci ilə qədər xarici sərhədləri boyunca “drone wall” (dron divarı) adlanan müdafiə sistemi qurmaq planının Atina tərəfindən müsbət qarşılandığı vurğulanıb. Bununla yanaşı, Yunanıstanın Türk müdafiə sənayesinin bu sistemlərə daxil edilməməsi yönündə fikrini bildirdiyi açıqlanıb.
Türkiyənin NATO daxilindəki mövqeyinə toxunan xəbərdə qeyd olunur ki, Türk müdafiə sənayesinin PUA texnologiyaları sahəsində qazandığı təcrübə bir çox NATO üzvü ölkələr tərəfindən ittifaqın strateji gücünə töhfə kimi qiymətləndirilir. Məlumata görə, Almaniya, İspaniya və İtaliya Türkiyəni bu sahədə dəstəkləyir, lakin Yunanıstan, Fransa və Cənubi Kipr Rum İdarəsi (GKRY) bu yanaşmaya qarşı çıxır.
“Kathimerini” həmçinin Yunanıstanın mövcud hava müdafiə sistemlərini yeniləməyə çalışdığını və İsraillə PUA texnologiyaları sahəsində əməkdaşlığını dərinləşdirdiyini yazıb.
Yunanıstanın müdafiə naziri Nikos Dendias son çıxışında Türkiyə istehsalı olan Bayraktar TB2 və TB3 dronlarına qarşı müdafiə tədbirlərinin gücləndirilməsinin vacibliyini vurğulayıb.
