BAKI,AzerVoice, Fərid Mikayılov

Rusiyaya bağlı “KillNet” və “Beregini” xaker qrupları Ukraynanın ən iri sığorta şirkətlərinin məlumat bazalarına kiberhücum edərək milyonlarla sənədi ələ keçirib.

AzerVoice xəbər verir ki, kiberhücum nəticəsində Ukraynanın altı böyük sığorta şirkətinin məlumat bazası sındırılıb və fiziki, hüquqi şəxslərə məxsus 10 milyondan artıq sənəd paketi yüklənib.

Əldə olunan məlumatlar sırasında sığorta müqavilələri, “yaşıl kart” sənədləri, daşınmaz əmlaka dair məlumatlar, korporativ sənədlər, avtomobil qeydiyyat məlumatları, sürücülük vəsiqələri, eləcə də foto və video materiallar yer alır.

“KillNet” nümayəndəsi bildirib ki, məlumatlar “xüsusi hərbi əməliyyat başa çatdıqdan sonra Ukrayna radikalları ilə əlaqəsi olan şəxslərin müəyyənləşdirilməsi üçün istifadə olunacaq”.

Qrup həmçinin iddia edir ki, əldə olunan bazalar Ukraynanın Təhlükəsizlik Xidməti (SBU), Baş Kəşfiyyat İdarəsi (GUR), Silahlı Qüvvələr və “nasist təbliğatı aparan şəxslər” barədə cinayət işlərinin açılmasına zəmin yaradacaq.

Xaker hücumunun Ukraynanın strateji sənaye obyektləri və istehsal müəssisələri ilə bağlı mühüm məlumatları da əhatə etdiyi bildirilir.

Ukrayna tərəfi hələlik məsələ ilə bağlı rəsmi açıqlama verməyib.