BAKI,AzerVoice, Orxan Qədirzadə
Səudiyyə Ərəbistanının ümumi daxili məhsulunun artım tempi 2027-ci ildə 4,5 faizədək yüksələcək. Bu barədə İngiltərə və Uelsin Sərbəst Mühasiblər İnstitutunun (ICAEW) Yaxın Şərq üzrə iqtisadi yeniləməsində bildirilib.
AzerVoice xəbər verir ki, hesabata görə, krallığın iqtisadi artımının 2025-ci ildə 4,5 faizdən 2026-cı ildə 4,3 faizə qədər bir qədər zəifləməsi proqnozlaşdırılır. Bununla belə, qeyri-neft sektorunda güclü dinamika davam edir. Oktyabr ayında Satınalma Menecerləri İndeksi (PMI) 60,2 bəndə yüksələrək 2014-cü ildən bəri ikinci ən yüksək səviyyəyə çatıb. Bu artım istehsal, yeni sifarişlər və məşğulluq göstəricilərində əhəmiyyətli yüksəlişi əks etdirir.
ICAEW-nin qiymətləndirməsinə əsasən, qeyri-neft iqtisadiyyatının 2026-cı ildə 5 faiz, 2027-ci ildə isə 5,3 faiz artacağı gözlənilir.
Məlumata görə, Səudiyyə Ərəbistanında büdcə kəsiri 2025-ci ilin üçüncü rübündə 88,5 milyard rial (23,5 milyard dollar) təşkil edib. 2025-ci il üzrə kəsirin ÜDM-in 5,3 faizinə, 2026-cı ildə isə 5,6 faizinə çatacağı proqnozlaşdırılır.
Bununla belə, artan maliyyə təzyiqlərinə baxmayaraq, dövlət xərclərinin ciddi şəkildə azaldılması gözlənilmir. Hesabatda vurğulanır ki, hökumətin yaxın perspektiv üçün kifayət qədər maliyyə ehtiyatları mövcuddur.
Son islahatlar çərçivəsində ölkədə daşınmaz əmlak sahəsində xarici investisiyalara qoyulan məhdudiyyətlər yumşaldılıb, yerli fond bazarına giriş asanlaşdırılıb. Riyadda kirayə qiymətlərinin artımını cilovlamaq məqsədilə beşillik icarə dondurulması tətbiq edilib. Analitiklər bunun yeni kirayə layihələrinə özəl investisiya marağını zəiflədə biləcəyini bildirirlər.
İnflyasiyanın 2025-ci ildə 2,2 faiz səviyyəsində qalacağı gözlənilir.
BƏƏ-də iqtisadi artım sürətlənəcək
Birləşmiş Ərəb Əmirliklərində ÜDM-in 2026-cı ildə 5,6 faiz yüksələcəyi proqnozlaşdırılır. Turizm, ticarət, maliyyə xidmətləri və OPEC+ kvotalarının yumşalmasından sonra neft hasilatında artım əsas drayverlərdən olacaq.
Qeyri-neft iqtisadiyyatı üzrə PMI göstəricisi 54 bənd səviyyəsində qərarlaşıb və qeyri-neft ÜDM-in 2026-cı ildə 4,3 faiz artacağı gözlənilir. "We the UAE 2031" strategiyası çərçivəsində federal büdcə gəlirlərinin əhəmiyyətli şəkildə artacağı bildirilir.
Dubai iqtisadiyyatı 2025-ci ilin ilk yarısında 4,4 faiz artım nümayiş etdirib və 6,9 faizlik büdcə profisiti qeydə alınıb.
GCC regionu üzrə proqnozlar
2026-cı ildə Körfəz Əməkdaşlıq Şurası ölkələrinin ÜDM-i 4,4 faiz artacaq. Qeyri-enerji sektorunda artım 4,1 faiz səviyyəsində proqnozlaşdırılır.
GCC regionunda istehlak xərclərinin növbəti iki ildə illik orta hesabla 3,5 faiz artacağı gözlənilir. 2026-cı ildə tətbiq ediləcək vahid GCC vizası turizm axınını daha da gücləndirəcək.
Bundan əlavə, regionda süni intellekt və yüksək texnologiyalar sahəsinə artan investisiyalar iqtisadi diversifikasiyanın əsas istiqamətlərindən biri kimi qiymətləndirilir.
