BAKI, AzerVoice, Orxan Qədirzadə
Suriya hökuməti gündə 150 min barel emal gücünə malik yeni neft emalı zavodu inşa edəcək. AzerVoice xəbər verir ki, bu barədə ölkənin energetika naziri dövlətə məxsus “Əxəbariyə” telekanalına açıqlamasında bildirib.
Nazirin sözlərinə görə, yeni layihə ölkənin enerji sektorunun bərpası və daxili istehsalın artırılması üçün hazırlanıb. Telekanalın ötən gün yaydığı məlumata əsasən, Baniyas neft emalı zavodu hazırda bir sıra texniki aşınmalar səbəbindən gücünü 95 min barelə qədər azaldıb və Suriyanın ümumi istehsal tutumu təxminən 130 min barel təşkil edir.
Nazir qeyd edib ki, yeni zavodun tikintisi Suriyanın enerji təhlükəsizliyini gücləndirməyə və yanacaq idxalından asılılığı azaltmağa yönəlib.
Suriya 2010-cu ildə — Bashar Əsəd rejiminə qarşı etirazların başlanmasından bir il əvvəl — gündə 380 min barel neft ixrac edirdi. Təxminən 14 illik müharibə ölkənin iqtisadiyyatını və infrastrukturunu, o cümlədən neft hasilatını ciddi şəkildə dağıdıb.
Ötən ilin dekabrında Əsədin devrilməsindən sonra hakimiyyətə gələn yeni hökumət neft sektorunun bərpasını və iqtisadiyyatın dirçəldilməsini prioritet elan edib.
