BAKI, AzerVoice, Orxan Qədirzadə
Rusiya Prezidenti Vladimir Putin bildirib ki, Ukraynada hərbi əməliyyatlar yalnız Ukrayna Silahlı Qüvvələri hazırda tutduqları mövqeləri tərk etdikdən sonra dayandırılacaq. AzerVoice xəbər verir ki, o bunu noyabrın 27-də Bişkekdə keçirilən mətbuat konfransında jurnalistlərin suallarını cavablandırarkən deyib.
Prezident qeyd edib ki, əgər Ukrayna qüvvələri mövqelərdən geri çəkilməsə, Rusiya “bu məqsədə döyüş yolu ilə nail olacağını” bildirir. Dövlət başçısı həmçinin təsdiqləyib ki, gələn həftənin ilk yarısında ABŞ-dan nümayəndə heyətinin Moskvaya səfəri planlaşdırılır.
Putin deyib ki, Rusiya ABŞ-la strateji sabitliklə bağlı bütün məsələləri müzakirəyə hazırdır və Vaşinqtonla danışıqlarda nüvə sınaqlarına hazırlıq mövzusunu qaldıracaq. O əlavə edib ki, Rusiya Avropa təhlükəsizliyi və strateji sabitliyi ilə bağlı məsələləri də Qərblə müzakirə etməyə hazırdır.
Onun sözlərinə görə, Moskva Avropaya qarşı hərbi niyyətinin olmadığını sənəd üzərində rəsmiləşdirməyə hazırdır. Putin bildirib ki, Qərbdə bir sıra siyasi dairələrin Rusiyanın Avropaya hücum hazırladığı ilə bağlı iddiaları “əsassız” və “ictimai rəy üzərində manipulyasiya”dır.
Prezident əlavə edib ki, bəzi siyasətçilər bu cür bəyanatlarla ya hərbi-sənaye kompleksinin maraqlarını müdafiə edir, ya da daxili siyasi reytinqlərini artırmağa çalışırlar.
Putin həmçinin ABŞ tərəfindən irəli sürülmüş 28 maddəlik mümkün sülh planının gələcək razılaşmalar üçün baza ola biləcəyini bildirib. O deyib ki, bu sənədin bir sıra müddəaları Rusiyanın mövqeyi ilə müəyyən dərəcədə üst-üstə düşür, lakin layihənin “diplomatik dilə” çevrilməsi və daha detallı müzakirə olunması zəruridir.
