BAKI,AzerVoice, Fərid Mikayılov
İran gələn həftə Pakistan ilə Əfqanıstanın Taliban hökuməti arasında növbəti vasitəçilik görüşünə ev sahibliyi etməyə hazırlaşır.
AzerVoice xəbər verir ki, diplomatik təşəbbüs 16–17 dekabr tarixlərində Tehranda keçirilməsi planlaşdırılan yüksək səviyyəli görüşlə yeni mərhələyə qədəm qoyur.
Məlumata görə, bundan əvvəl Doha, İstanbul və Ciddədə keçirilmiş danışıqlar nəticə verməmişdi.
Tehrandakı görüşü fərqləndirən əsas məqam regional güclər Çin və Rusiyanın iştirakının gözlənilməsidir. Bu, Pakistan–Əfqanıstan xəttində artan gərginliyin daha geniş regional stabilliyə təhdid kimi qiymətləndirildiyini göstərir.
Diplomatik mənbələr bildirir ki, Pakistanı danışıqlarda ölkənin Əfqanıstan üzrə xüsusi elçisi, səfir Məhəmməd Sadiq təmsil edəcək.
Görüşdə sərhəd təhlükəsizliyi, militant qruplarla mübarizə, qaçqın məsələsi və iqtisadi əlaqələrin bərpası kimi mövzuların müzakirəsi gözlənilir.
