BAKI, AzerVoice, Orxan Qədirzadə
Böyük Britaniyada həbsdə saxlanılan və aclıq aksiyası keçirən səkkiz Palestine Action fəalının həyatı ciddi təhlükə altındadır.
AzerVoice xəbər verir ki, onları təmsil edən hüquqşünaslar ədliyyə naziri və baş nazirin müavini Devid Lamminin müdaxilə etmədiyi təqdirdə fəalların həbsxanada həyatını itirə biləcəyini bildiriblər.
Məlumata görə, iki fəal aksiyanın 46-cı gününə, biri isə 45-ci gününə çatıb. Qeyd olunur ki, 1981-ci ildə Şimali İrlandiyada IRA üzvlərindən biri məhz 46-cı gündə aclıq aksiyası zamanı həyatını itirmişdi. Hüquqşünasların Lammi-yə ünvanladığı məktubda ölümlərin artıq “sadəcə ehtimal deyil, real risk” olduğu vurğulanıb.
Aclıq aksiyasında iştirak edənlərin heç biri hələ məhkum edilməyib. Onlar İsraillə əlaqəli silah şirkətləri və hərbi obyektlərə qarşı etiraz aksiyaları çərçivəsində törədildiyi iddia olunan iki insidentlə bağlı uzunmüddətli istintaq həbsində saxlanılır.
20 yaşlı fəal Qesser Zuhrah noyabrın 2-dən etibarən qidadan imtina edib. Onun bir neçə gün əvvəl həbsxanada huşunu itirdiyi, saatlarla yerdə qaldığı və daha sonra xəstəxanaya çatdırıldığı bildirilib. Digər fəal – 30 yaşlı Emi Qardiner-Qibsonda isə kognitiv zəifləmə və qan göstəricilərində ciddi azalma qeydə alınıb.
Hüquqşünaslar aksiyanı 1981-ci ildən bəri Böyük Britaniyada keçirilən ən genişmiqyaslı koordinasiyalı həbsxana aclıq aksiyası adlandırıb. 58 deputatın imzaladığı parlament təşəbbüsündə fəalların vəziyyəti ilə bağlı “dərin narahatlıq” ifadə olunub. Buna baxmayaraq, Devid Lammi hüquqşünaslarla görüşməkdən imtina edib.
Baş nazir Kir Starmer isə parlamentdə çıxışı zamanı aclıq aksiyaları ilə bağlı mövcud qayda və prosedurlara əməl edildiyini bildirib. Ədliyyə Nazirliyi isə məhbusların sağlamlıq vəziyyətinin daim qiymətləndirildiyini və tibbi zərurət yaranarsa xəstəxanaya yerləşdiriləcəyini açıqlayıb.
Qeyd olunur ki, fəalların saxlanılması Palestine Action təşkilatının bu ilin iyulunda terror təşkilatı kimi tanınmasından əvvəl baş verən hadisələrlə bağlıdır. Aksiya iştirakçıları təcili girov qarşılığında azadlığa buraxılmağı, təşkilatın qadağasının ləğvini və həbsxanada ünsiyyət məhdudiyyətlərinin aradan qaldırılmasını tələb edirlər.
