BAKI, AzerVoice, Orxan Qədirzadə
Rusiya ABŞ-la yaranmış gərginlik fonunda Venesuelaya “tam dəstək” verdiyini açıqlayıb. Bu barədə Rusiya və Venesuela xarici işlər nazirləri arasında keçirilən telefon danışığından sonra məlumat verilib.
AzerVoice-un məlumatına görə, Rusiya Xarici İşlər Nazirliyi bildirib ki, Sergey Lavrov və Venesuelanın xarici işlər naziri İvan Gil ABŞ-ın Karib hövzəsində həyata keçirdiyi addımları müzakirə edib. Tərəflər Vaşinqtonun sanksiyalara məruz qalmış Venesuela neft tankerlərinə qarşı blokada tədbirlərindən və gəmilərin müsadirəsindən narahatlıq ifadə ediblər.
Nazirlər Karib dənizində vəziyyətin gərginləşməsinin region üçün ciddi nəticələrə və beynəlxalq dəniz daşımalarına təhlükə yarada biləcəyini vurğulayıblar. Rusiya tərəfi mövcud şəraitdə Venesuela rəhbərliyi və xalqı ilə həmrəy olduğunu bir daha təsdiqləyib.
Bəyanata görə, tərəflər ikitərəfli əməkdaşlığın davam etdirilməsi və beynəlxalq platformalarda, xüsusilə Birləşmiş Millətlər Təşkilatında fəaliyyətlərin əlaqələndirilməsi barədə razılığa gəliblər. Məqsəd dövlətlərin suverenliyinə hörmətin və daxili işlərə qarışmama prinsipinin qorunmasıdır.
Qeyd edək ki, Venesuelanın müraciəti əsasında ABŞ ilə Venesuela arasında artan gərginlik BMT Təhlükəsizlik Şurasının gündəminə çıxarılıb. Müraciət Çin və Rusiya tərəfindən dəstəklənib və Şuranın bu məsələni müzakirə edəcəyi gözlənilir.
Venesuela XİN rəhbəri İvan Gil sosial şəbəkədə bildirib ki, tərəflər ABŞ-ın Karib hövzəsində gəmilərə qarşı hücumlar və beynəlxalq hüququn pozulması ilə bağlı iddiaları müzakirə ediblər. ABŞ isə sentyabr ayından etibarən Karib dənizi və Sakit okeanın şərqində narkotik qaçaqmalçılığı ilə əlaqələndirdiyi gəmilərə qarşı əməliyyatlar apardığını açıqlayıb.
ABŞ prezidenti Donald Tramp dekabrın 16-da Venesuelaya gedən və ya bu ölkədən çıxan sanksiyalı neft gəmilərinə qarşı blokada elan edib.
