BAKI,AzerVoice, Orxan Qədirzadə
Fransa hakimiyyəti miqrantların La-Manşı keçərək Böyük Britaniyaya çatmasının qarşısını almağa cəhd edən 10 britaniyalı ifrat sağçı fəalın ölkəyə girişini qadağan edib.
AzerVoice xəbər verir ki, Fransanın Daxili İşlər Nazirliyinin açıqlamasına görə, qərar özünü “Raise the Colours” adlandıran qrupla əlaqəli şəxslərin şimal sahillərində miqrant qayıqlarını axtarması, məhv etməyə cəhd göstərməsi və təbliğat fəaliyyəti aparması ilə bağlı məlumatlardan sonra verilib.
Nazirlik bildirib ki, sözügedən 10 nəfər barəsində Fransa ərazisinə giriş və ölkədə qalmağı qadağan edən inzibati qərar çərşənbə axşamı qüvvəyə minib.
Fransanın daxili işlər naziri Loran Nüne sosial şəbəkədə paylaşımında “Bizim hüquqi dövlət prinsiplərimiz müzakirə mövzusu deyil. Zorakılıq və nifrət doğuran fəaliyyətlərin Fransa ərazisində yeri yoxdur”-bildirib.
Fransa rəsmiləri qadağa tətbiq edilən şəxslərin adlarını açıqlamayıb. Bununla yanaşı, sentyabr ayında miqrantlara qarşı törədildiyi iddia olunan “ağırlaşdırılmış hücum” faktı üzrə ayrıca istintaq başladılıb.
AFP-nin məlumatına görə, sentyabrın 9-dan 10-na keçən gecə Dünkirk yaxınlığındakı Grand-Fort-Filipp bölgəsində Britaniya və İngiltərə bayraqları daşıyan dörd nəfər miqrantlara sözlü və fiziki hücum edib. Hücum zamanı onlara İngiltərədə “xoş qarşılanmadıqları” bildirilib.
“Raise the Colours” qrupu isə X sosial şəbəkəsində yaydığı açıqlamada Fransa hakimiyyətindən rəsmi bildiriş almadıqlarını iddia edib və zorakılığı dəstəkləmədiklərini bəyan edib.
