BAKI, AzerVoice, Orxan Qədirzadə

İtaliya Avropa İttifaqı ilə ABŞ arasında mümkün ticarət qarşıdurmasının dərinləşməsinə qarşı mövqe sərgiləyib.

AzerVoice xəbər verir ki, İtaliyanın müdafiə naziri Quido Krozetto ABŞ Prezidenti Donald Trampın Qrenlandiya ilə bağlı açıqlamaları fonunda Avropa İttifaqında müzakirə olunan cavab ticarət tədbirlərini tənqid edib. O bildirib ki, ABŞ-a qarşı əks rüsumların tətbiqi mümkün olan ən pis cavab variantı olardı.

Nazirin açıqlamaları Fransa Prezidenti Emmanuel Makronun Aİ-nin “məcburiyyətə qarşı mexanizm”ini işə salmaq və ümumi həcmi 93 milyard avroya qədər çata bilən ticarət tədbirləri tətbiq etmək çağırışından sonra səslənib. Bu müzakirələr ABŞ-ın fevralın 1-dən etibarən bir sıra Avropa ölkələrinə qarşı 10 faiz, iyunun 1-dən isə 25 faizlik gömrük rüsumları tətbiq edəcəyini elan etməsindən sonra başlanıb.

Krozetto sosial şəbəkələrdə yayımlanan müzakirələrə münasibət bildirərək Avropanın mümkün cavab tədbirlərini “axmaqlar gəmisi” adlandıran fikirlə razılaşdığını vurğulayıb. Onun sözlərinə görə, hazırkı mərhələdə “fərqli komandaların fanatı olmaq, kim daha sərt və qürurlu davranacaq deyə yarışmaq vaxtı deyil”.

İtaliyanın müdafiə naziri xatırladıb ki, ABŞ və Avropa ölkələri artıq 76 ildir müttəfiqdir. O qeyd edib ki, müttəfiqlər arasında bir-birinə daha çox zərər vurmaq yarışına girmək yalnız fəlakətə aparıb çıxara bilər.

Krozetto daha əvvəl Avropa ölkələrinin Qrenlandiyaya məhdud sayda hərbi qüvvə göndərməsini də istehza ilə şərh etmiş, Qərb dünyasının birliyinin qorunmasının vacibliyini önə çəkmişdi.