BAKI, AzerVoice, Orxan Qədirzadə
Fransa hökuməti ABŞ Prezidenti Donald Trampın təşəbbüsü ilə yaradılan “Sülh Şurası”na bu mərhələdə qoşulmayacağını açıqlayıb.
AzerVoice xəbər verir ki, Fransa Xarici İşlər Nazirliyinin sözçüsü Paskal Konfavrö açıqlamasında bildirib ki, “Sülh Şurası”nın nizamnaməsi Qəzzada müharibənin həlli ilə bağlı BMT qətnaməsinə uyğun gəlmir və sənəddə Birləşmiş Millətlər Təşkilatının Nizamnaməsinə zidd müddəalar mövcuddur. Onun sözlərinə görə, nizamnamə bir tərəfdən Qəzza ilə bağlı konkret mandatı əhatə etmir, digər tərəfdən isə beynəlxalq hüquq prinsipləri ilə ziddiyyət təşkil edən elementlər ehtiva edir.
Rəsmi Paris vurğulayıb ki, Fransa Qəzza münaqişəsinin həllində BMT çərçivəsində qəbul edilmiş qərarların əsas götürülməsini vacib hesab edir və bu səbəbdən yeni təşəbbüsün hazırkı formatı qəbuledilən sayılmır.
Ekspertlərin rəyinə görə, ilkin mərhələdə Qəzzada atəşkəsə nəzarət üçün nəzərdə tutulan “Sülh Şurası” sonradan daha geniş və iddialı beynəlxalq mexanizmə çevrilib. Şuranın üzvlük tərkibi və səlahiyyət dairəsi ilə bağlı qeyri-müəyyənlik isə Vaşinqtona ən yaxın müttəfiqlərdən bəzilərinin bu təşəbbüsə ehtiyatla yanaşmasına səbəb olub.
