BAKI,AzerVoice, Fərid Mikayılov
Avropa İttifaqının xarici siyasət üzrə ali nümayəndəsi Kaja Kallas bildirib ki, Aİ xarici işlər nazirləri İran İnqilab Keşikçiləri Korpusunun (SEPAH) terror təşkilatları siyahısına salınması məsələsini müzakirə etməyə hazırlaşır.
AzerVoice xəbər verir ki, Brüsseldə keçiriləcək toplantı ərəfəsində jurnalistlərə açıqlama verən Kallas, İranda kütləvi etiraz aksiyalarına qarşı tətbiq olunan sərt və ölümcül repressiyaların bu qərarı zəruri etdiyini vurğulayıb.
“Əgər siz terrorçu kimi hərəkət edirsinizsə, terrorçu kimi də qiymətləndirilməlisiniz” - deyə Kaya Kallas bildirib.
Məlumata görə, qərarın qəbul edilməsi İranın təhlükəsizlik strukturlarına qarşı Avropa İttifaqının siyasi və hüquqi təzyiqlərini daha da gücləndirə bilər.
Bu addım, eyni zamanda, Tehranın daxili siyasətinə və insan hüquqları sahəsində vəziyyətə beynəlxalq reaksiyanın sərtləşdiyini göstərən mühüm siqnal kimi qiymətləndirilir.
