BAKI,AzerVoice, Orxan Qədirzadə
Bazarlar son günlər süni intellekt xərcləri ilə bağlı narahatlıqlar və Epşteyn işi üzrə yeni sənədlərin dövriyyəyə çıxması fonunda yüksələn informasiya təzyiqi altında dalğalanır.
AzerVoice xəbər verir ki, ABŞ Ədliyyə Nazirliyi Epşteyn işi üzrə geniş həcmli materialların ictimaiyyətə təqdim edildiyini açıqlayıb. Bu fonda sosial mediada yayılan müxtəlif iddialar və şərhlər investor davranışına da təsir göstərib, xüsusilə böyük texnologiya şirkətlərinin səhmlərində riskdən yayınma meyli güclənib.
Beynəlxalq maliyyə icmallarında qeyd olunur ki, proqram təminatı və məlumat xidmətləri seqmentində son həftələr kəskin ucuzlaşma dalğası müşahidə edilib və bu geriləmə süni intellektin sektora mümkün təsirləri, eləcə də iri şirkətlərin artan kapital xərcləri ilə bağlı narahatlıqlarla izah olunur.
Bu prosesdən ən çox təsirlənən nəhənglərdən biri “Microsoft” olub. Yanvarın 29-da şirkətin səhmləri bir gündə təxminən 10% geriləyib və bazar dəyərində 350 milyard dollardan çox azalma qeydə alınıb. Analitiklər itkilərin birbaşa “real maliyyə itkisi” deyil, səhm qiymətinin dəyişməsi nəticəsində bazar kapitalizasiyasının azalması olduğunu vurğulayırlar.
Müşahidəçilər bildirir ki, “Microsoft”un pay qiymətinə təzyiq yaradan əsas amillər arasında “Azure” bulud xidmətlərində artım tempinə dair gözləntilər, süni intellekt infrastrukturuna böyük həcmli yatırımların gəlirliliyi ilə bağlı suallar və bazarda ümumi risk iştahının zəifləməsi yer alır.
Eyni zamanda, Epşteyn materialları ətrafında yenidən qızışan müzakirələr bir sıra məşhur şəxslərin və çevrələrin mediada yenidən gündəmə gəlməsinə səbəb olub. Reuters-in fakt materiallarında qeyd olunur ki, sənədlər müxtəlif yüksək profilli şəxslərə dair təmas və yazışmalar barədə detallar da ehtiva edir.
