BAKI,VOA, Fərid Mikayılov
ABŞ ordusu Qətərin paytaxtı Doha yaxınlığında yerləşən Əl-Udeyd Hava Bazasından yüzlərlə amerikalı hərbçini təxliyə edib.
VOA xəbər verir ki, bu barədə The New York Times qəzeti məlumat yayıb.
Nəşrin ABŞ Müdafiə Nazirliyindəki mənbələrə istinadla bildirdiyinə görə, təxliyə prosesi mərhələli şəkildə həyata keçirilib. Eyni zamanda, ABŞ Hərbi Dəniz Qüvvələrinin 5-ci Donanmasının yerləşdiyi Bəhreyndəki bazalardan da müəyyən sayda şəxsi heyətin çıxarıldığı qeyd olunur.
Məlumatda vurğulanır ki, bu addımlar İranla ABŞ arasında Tehranının nüvə proqramı ilə bağlı dolayı diplomatik təmasların davam etdiyi bir dövrdə atılıb. Diplomatik proses paralelində Vaşinqtonun regionda hərbi hazırlıq səviyyəsini yüksəltdiyi bildirilir.
Açıq mənbəli kəşfiyyat məlumatlarını izləyən analitik platformaların paylaşımına əsasən, son bir həftə ərzində ABŞ Silahlı Qüvvələrinə məxsus 100-dən artıq hərbi təyyarə Avropa və Yaxın Şərq istiqamətində uçuş həyata keçirib.
Hazırda ABŞ Hərbi Dəniz Qüvvələrinə məxsus USS Abraham Lincoln və USS Gerald R. Ford təyyarədaşıyan gəmilərinin ümumilikdə 120-dən çox döyüş təyyarəsi daşıdığı bildirilir.
Bundan əlavə, ABŞ-ın Avropa Komandanlığı (EUCOM) və Mərkəzi Komandanlığının (CENTCOM) sərəncamında 200-dən artıq döyüş təyyarəsi və təxminən 108 yanacaq doldurma təyyarəsinin olduğu təxmin edilir.
ABŞ prezidenti Donald Trump Vaşinqtonda keçirilən Qəzza Sülh Forumu çərçivəsində çıxışı zamanı İranla bağlı prosesin istiqamətinin yaxın 10 gün ərzində aydınlaşacağını bildirib. Tramp, “İranla mənalı bir razılaşma əldə edilməlidir, əks halda ciddi nəticələr ola bilər”, — deyə xəbərdarlıq edib.
Qətərin cənub-qərbində, səhralıq ərazidə yerləşən Əl-Udeyd Hava Bazası ABŞ-ın Yaxın Şərqdəki ən böyük hərbi obyekti hesab olunur. Təxminən 24 hektar ərazini əhatə edən baza ABŞ Mərkəzi Komandanlığının regional qərargahına ev sahibliyi edir.
Bu bazadan Şimali-Şərqi Afrika, Yaxın Şərq və Cənubi Asiya ərazilərində aparılan hava əməliyyatları koordinasiya olunur. İraq, Suriya və Yəmən istiqamətində həyata keçirilən hərbi əməliyyatların böyük hissəsi məhz Əl-Udeyddən idarə edilir.
Bazanın ərazisində uzun mənzilli bombardmançı təyyarələr, yanacaq doldurma və nəqliyyat təyyarələri, eləcə də pilotsuz uçuş aparatları yerləşdirilib. Hazırda Əl-Udeyddə təxminən 10 min ABŞ hərbçisi xidmət edir.
