BAKI,VOA, Fərid Mikayılov
Cənubi Amerikanın Çili Respublikasında yeni prezident vəzifəsinin icrasına başlayıb.
VOA xəbər verir ki, 2025-ci il dekabrın 14-də keçirilən prezident seçkilərinin ikinci turunda qalib gələn 60 yaşlı Xose Antonio Kast Valparaiso şəhərində yerləşən Milli Konqresdə keçirilən mərasimdə and içərək rəsmi şəkildə vəzifəyə başlayıb.
Mərasim zamanı prezident səlahiyyətlərinin rəmzi olan prezident kəməri Kastın üzərinə taxılıb. Səlahiyyət müddəti başa çatan sabiq prezident Qabriel Boriç də tədbirdə iştirak edərək dövlət başçılığı simvolu hesab olunan “Pioça de O'Higgins” nişanını yeni prezidentə təqdim edib.
Andiçmə mərasimindən sonra Kast Çili ənənəsinə uyğun olaraq Vinya del Mar şəhərində yerləşən Cerro Kastilyo Prezident Sarayında xarici nümayəndə heyətləri üçün təşkil olunan rəsmi nahar tədbirinə qatılıb.
Məlumata görə, yeni prezidentin axşam saatlarında paytaxt Santyaqo şəhərinə gedərək La Moneda Prezident Sarayının balkonundan xalqa müraciət etməsi gözlənilir.
Kastın andiçmə mərasimində İspaniya kralı Felipe, Argentina prezidenti Xavyer Milei, Boliviya prezidenti Rodrigo Pas, Panama prezidenti Xose Raul Mulino, Honduras prezidenti Nasri Asfura, Kosta Rika prezidenti Rodrigo Çaves, Paraqvay prezidenti Santyaqo Pena, Uruqvay prezidenti Yamandu Orsi, eləcə də bir çox ölkənin diplomatik nümayəndələri iştirak edib.
Xose Antonio Kast kimdir?
Alman mənşəli ailədən olan və peşəcə hüquqşünas olan Xose Antonio Kast Çili siyasətində sağ yönümlü mövqeyi ilə tanınır.
Onun siyasi fəaliyyəti Çili Katolik Universitetində hüquq təhsili aldığı dövrdə başlayıb. Həmin illərdə o, 1980-ci il Konstitusiyasının hazırlanmasında iştirak edən siyasətçi Xayme Qusman tərəfindən yaradılan Gremial hərəkatında fəaliyyət göstərib.
Kast uzun illər Müstəqil Demokratik Birlik Partiyasında siyasətlə məşğul olub. Bu müddətdə bələdiyyə məclisinin üzvü kimi fəaliyyət göstərib və 2002–2018-ci illərdə deputat olub.
2019-cu ildə isə o, daha sərt siyasi xətti təmsil etdiyini bildirərək Respublikaçılar Partiyasını yaradıb.
Kast təhlükəsizlik siyasəti, miqrasiya əleyhinə mövqeyi və mühafizəkar sosial baxışları ilə tanınır. O, həmçinin hərbi diktatura lideri Auqusto Pinoçet dövrü ilə bağlı bəzi müsbət açıqlamaları səbəbindən tez-tez siyasi müzakirələrin mərkəzində olub.
2017 və 2021-ci illərdə prezident seçkilərində məğlub olan Kast üçüncü cəhdində qalib gələrək ikinci turda solçu rəqibi Jeannette Jara üzərində qələbə qazanıb.
