BAKI,VOA, Orxan Qədirzadə
Fransa və Pakistanın xarici işlər nazirləri arasında baş tutan telefon danışığında İslamabad danışıqları və regional təhlükəsizlik məsələləri müzakirə edilib.
VOA xəbər verir ki, Fransa Xarici İşlər Nazirliyinin verdiyi məlumata görə, tərəflər ABŞ və İran arasındakı atəşkəs prosesinin Livanı da əhatə etməsinin vacibliyi barədə həmfikirdirlər.
Fransa Xarici İşlər Naziri öz pakistanlı həmkarı ilə söhbətində İranın bölgədəki təhdidlərinə qarşı effektiv diplomatik mexanizmlərin qurulmasının zəruriliyini vurğulayıb. Nazirlər qeyd ediblər ki, əldə olunan iki həftəlik müvəqqəti atəşkəsin davamlı və stabil olması üçün Livan cəbhəsindəki hərbi əməliyyatların dayandırılması razılaşmanın bəndlərinə mütləq daxil edilməlidir.
Fransa tərəfi həmçinin bildirib ki, Livanın bu sazişdən kənarda qalması regional gərginliyin tam aradan qaldırılmasına mane ola bilər və atəşkəs rejimini kövrək vəziyyətdə saxlayar. Pakistan tərəfi də öz növbəsində vasitəçilik səylərində bu məqamı diqqət mərkəzində saxlayacağını və tərəflər (ABŞ-İran) arasında ortaq məxrəc tapılması üçün çalışacağını bildirib.
