BAKI,VOA, Fərid Mikayılov
Pentaqon rəsmiləri İranla davam edən hərbi gərginliyin ABŞ iqtisadiyyatına vurduğu ziyanın sürətlə artdığını bildiriblər.
VOA xəbər verir ki, son hesablamalara görə, davam edən münaqişənin ABŞ-a ümumi maliyyə yükü artıq 29 milyar dollara yüksəlib.
Bu göstərici Pentaqonun cəmi iki həftə əvvəl Konqresə təqdim etdiyi 25 milyar dollarlıq proqnozu xeyli üstələyib. Maliyyə yükünün artım sürəti ekspertlər arasında ciddi narahatlıq doğurur. Harvard Kennedi Məktəbinin mütəxəssisləri hələ aprel ayında xəbərdarlıq etmişdilər ki, münaqişənin ABŞ vergi ödəyicilərinə verəcəyi ümumi zərər uzunmüddətli perspektivdə 1 trilyon dollara çata bilər.
ABŞ Prezidenti Donald Tramp məsələni çinli həmkarı Si Cinpin ilə müzakirə etmək üçün Pekinə səfər edir. Çin İranın ən yaxın müttəfiqlərindən biri və İran neftinin əsas idxalçısı olsa da, Tramp Pekində keçiriləcək genişmiqyaslı görüş öncəsi fərqli mövqe nümayiş etdirib. Prezident, Çinin köməyinə ehtiyac duyulduğu barədə fikirlərlə razılaşmadığını vurğulayıb.
Münaqişənin iqtisadi fəsadlarına toxunan Tramp bildirib ki, danışıqlarda əsas hədəf maliyyə göstəriciləri deyil, İranın nüvə silahı əldə etməsinin qarşısını almaqdır. ABŞ lideri amerikalıların maliyyə vəziyyətindən daha çox strateji təhlükəsizliyə önəm verdiyini qeyd edərək: "İranın nüvə silahına sahib olmasına icazə verilə bilməz" deyə vurğulayıb.
