BAKI,VOA Yusif Şərifzadə
Hindistan Oman sahilləri yaxınlığında Hindistan bayrağı altında üzən ticarət gəmisinə edilən hücumu pisləyərək, bu cür hadisələri “qəbuledilməz” adlandırıb.
VOA xəbər verir ki, Hindistan Xarici İşlər Nazirliyinin açıqlamasına görə, Oman rəsmiləri tərəfindən xilas edilən gəmidə olan bütün hindistanlı heyət üzvləri sağdır.
Nazirlik bildirib: “Dünən Oman sahilləri yaxınlığında Hindistan bayraqlı gəmiyə hücum qəbuledilməzdir” və əlavə edib ki, “ticarət gəmiləri və mülki dənizçilər hədəf alınmağa davam edir.”
Hindistan həmçinin Hörmüz boğazı yaxınlığında dəniz ticarəti və naviqasiyanı təhdid edən hücumlara qarşı xəbərdarlıq edib və bildirib ki, mülki gəmiçiliyin təhlükəyə atılması və azad ticarət hərəkətinin məhdudlaşdırılması yolverilməzdir.
Dəniz təhlükəsizliyi üzrə “Vanguard” şirkəti gəmini MSV Hacəli kimi müəyyən edib. Bildirilib ki, 14 nəfər heyət üzvü olan gəmi Omanın Limah sahilləri yaxınlığında, Hörmüz boğazının cənubunda baş verən partlayışdan sonra batıb.
