BAKI,VOA,Yusif Şərifzadə

Doha Alişah Universitetinin professoru Məhəmməd Elmasri hesab edir ki, ABŞ-ın İrana qarşı son zərbələri danışıqların dalana dirənməsindən yaranan məyusluğun nəticəsi ola bilər.

VOA xəbər verir ki, media araşdırmaları üzrə professor Məhəmməd Elmasri ABŞ və İran arasında son günlər müşahidə olunan qarşılıqlı hücumların tammiqyaslı müharibə riskini artırdığını, lakin tərəflərin hələ də diplomatik yolu tam bağlamaq istəmədiyini bildirib.

Onun sözlərinə görə, bir neçə gündür davam edən qarşılıqlı hücumlar regionda təhlükəli vəziyyət yaratsa da, həm Vaşinqton, həm də Tehran hazırda genişmiqyaslı müharibəyə qayıtmaq niyyətində deyil.

Elmasri qeyd edib ki, ABŞ-ın son əməliyyatları “müdafiə xarakterli” kimi təqdim etməsi Vaşinqtonun niyyətləri barədə mühüm siqnaldır. O hesab edir ki, bu yanaşma ABŞ-ın daha geniş hərbi eskalasiyadan yayınmağa çalışdığını göstərir.

Ekspert əlavə edib ki, İranın cavablarının nisbətən məhdud qalması da Tehran tərəfinin vəziyyəti tammiqyaslı qarşıdurmaya çevirmək istəmədiyini nümayiş etdirir.

Məhəmməd Elmasrinin fikrincə, ABŞ Prezidenti Donald Tramp uzun müddətdir İranın razılaşmaya məcbur qaldığını iddia etsə də, Tehran da danışıqlarda ciddi təsir imkanlarına malikdir və öz şərtlərini qəbul etdirməyə çalışır.

Professor bildirib ki, son ABŞ zərbələri danışıqların Vaşinqtonun gözlədiyi kimi irəliləməməsi səbəbindən yaranan “məyusluğun” nəticəsi ola bilər və bu vəziyyət ABŞ rəhbərliyini daha sərt addımlar atmağa sövq edib.

Regionda artan hərbi gərginlik fonunda beynəlxalq ictimaiyyət tərəfləri diplomatik həll yollarına üstünlük verməyə çağırır.