BAKI,VOA, Fərid Mikayılov

Rusiyanın nəzarətində olan Zaporojye Atom Elektrik Stansiyası Ukrayna ordusunun stansiyanın ərazisinə növbəti hücum həyata keçirdiyini açıqlayıb.

VOA xəbər verir ki, hücum bu gün nəqliyyat binasını hədəf alıb. Bildirilib ki, hadisə nəticəsində 6 avtobus və 2 avtomobil yararsız vəziyyətə düşüb.

Açıqlamada qeyd olunub ki, hücum zamanı ölən və ya yaralanan olmayıb, stansiyanın fəaliyyəti isə normal rejimdə davam edir.

Qeyd edək ki, Avropanın ən böyük atom elektrik stansiyası hesab edilən Zaporojye AES 2022-ci ilin mart ayından etibarən Rusiya qüvvələrinin nəzarəti altındadır. Müharibə dövründə stansiya ətrafında dəfələrlə hücum və qarşılıqlı ittihamlar qeydə alınıb. Rusiyanın və Ukraynanın hadisə ilə bağlı iddialarını müstəqil mənbələr vasitəsilə təsdiqləmək mümkün olmayıb.