BAKI,VOA,Yusif Şərifzadə
Bəhreyn hakimiyyəti İranın ölkəyə və qonşu Küveytə hücumlarından bir neçə saat sonra İran İnqilab Keşikçiləri Korpusu ilə əlaqədə olmaqda ittiham edilən 15 nəfərin saxlanıldığını açıqlayıb.
VOA xəbər verir ki, Bəhreyn Daxili İşlər Nazirliyi hadisə ilə bağlı araşdırmaların davam etdiyini və iddia edilən şəbəkə ilə əlaqəsi olan bütün şəxslərin müəyyənləşdirilməsi istiqamətində tədbirlərin görüldüyünü bildirib.
Məlumata görə, İranın fevral ayının sonlarından etibarən Bəhreynə qarşı hücumlara başlamasından sonra ölkədə təhlükəsizlik tədbirləri gücləndirilib və Tehranla əməkdaşlıqda ittiham olunan onlarla şəxs saxlanılıb.
Ötən ay Bəhreyn məhkəməsi hakimiyyət orqanlarının “düşmənçilik və terror xarakterli fəaliyyət” kimi qiymətləndirdiyi əməllərə görə doqquz nəfəri ömürlük azadlıqdan məhrum edib. Rəsmi məlumata əsasən, həmin şəxslər İran İnqilab Keşikçiləri Korpusu ilə əməkdaşlıq etməkdə təqsirli biliniblər.
Aprel ayında isə İranın hücumlarını dəstəkləməkdə ittiham olunan 69 nəfər Bəhreyn vətəndaşlığından məhrum edilib.
Bəhreyn əhalisinin əhəmiyyətli hissəsini şiələr təşkil edir. Şiə icmasının nümayəndələri uzun illərdir siyasi və iqtisadi sahələrdə ayrı-seçkiliyə məruz qaldıqlarını bildirirlər. Hökumət isə bu ittihamları rədd edir və ölkədəki sabitliyi pozmağa çalışmaqda İranı günahlandırır.
