BAKI,VOA,Yusif Şərifzadə

Beynəlxalq Böhran Qrupunun təhlilçisi Devid Vuds hesab edir ki, ABŞ-ın İsrailə təsir göstərmək üçün istifadə edə biləcəyi vasitələr siyasi bəyanatlar və diplomatik çağırışlarla məhdudlaşmır.

VOA xəbər verir ki, təhlilçi Vaşinqtonun İsrail hökumətinə təsir etmək üçün daha ciddi və praktik imkanlara malik olduğunu bildirib.

Onun sözlərinə görə, əsas məsələ ABŞ Prezidenti Donald Trampın İsrailin Baş naziri Benyamin Netanyahuya və İsrailin hərbi fəaliyyətlərinə təsir göstərmək üçün bu vasitələrdən istifadə etməyə nə dərəcədə hazır olmasıdır.

Devid Vuds qeyd edib ki, ABŞ-ın əlində silah tədarükü ilə bağlı qərarlardan başqa, digər mühüm təsir mexanizmləri də mövcuddur.

Təhlilçinin fikrincə, bunlara hərbi əməliyyatlarla bağlı kəşfiyyat məlumatlarının paylaşılmaması və ya raketdən müdafiə tədbirlərində iştirakın məhdudlaşdırılması kimi addımlar daxil ola bilər.

“ABŞ nə dərəcədə real və praktik təsir vasitələrindən istifadə etməyə hazırdır? Bu yalnız silah satışları ilə bağlı deyil. Buraya hərbi əməliyyatlar üçün kəşfiyyat məlumatlarının paylaşılmaması və ya raketdən müdafiə tədbirlərində iştirak etməmək kimi addımlar da daxil ola bilər”, – deyə o bildirib.

Vuds hesab edir ki, belə addımlar İsrail tərəfindən siyasi bəyanatlardan və sərt diplomatik xəbərdarlıqlardan daha ciddi qəbul edilə bilər.

Onun sözlərinə görə, İsrail və İran arasında son gərginlik fonunda Vaşinqtonun hansı addımları seçəcəyi regiondakı proseslərin gələcək inkişafına birbaşa təsir göstərə bilər.