BAKI,VOA Orxan Qədirzadə
ABŞ Prezidenti Donald Trampın 2025-ci ildə kriptovalyuta sahəsindəki fəaliyyətindən təxminən 1,4 milyard ABŞ dolları gəlir əldə etdiyi məlum olub.
Bu məlumat ABŞ Hökumət Etikası İdarəsinin açıqladığı maliyyə bəyannaməsində yer alıb. Sənədlərə əsasən, Trampın təqdim etdiyi maliyyə hesabatında onun və ailəsinə məxsus şirkətlərin rəqəmsal aktivlər bazarından əldə etdiyi gəlirlər əks olunub.
Maliyyə sənədlərinə görə, Donald Trampın şirkətləri və ailəsinə məxsus müəssisələr 2024-cü ilin sentyabr ayında fəaliyyətə başlayan "World Liberty Financial" kriptovalyuta şirkətindən təxminən 800 milyon ABŞ dolları gəlir əldə ediblər. Həmin layihə Tramp ailəsinin dəstəyi və adı ilə bazara təqdim olunub.
Sənədlərdə göstərilir ki, Donald Tramp bununla yanaşı, 2025-ci ilin yanvar ayında andiçmə mərasimindən bir neçə saat əvvəl dövriyyəyə buraxılmış "TRUMP $" adlı kriptovalyuta ilə bağlı lisenziya müqaviləsindən müəlliflik hüquqları üzrə 635 milyon ABŞ dolları məbləğində gəlir qazanıb.
ABŞ-da 1978-ci ildə qəbul edilmiş qanun ölkə prezidenti və vitse-prezidentini gəlirləri və maliyyə aktivləri barədə rəsmi bəyannamə təqdim etməyə öhdəlikli edir.
Açıqlanan məlumatlar Donald Trampın hazırda əsas gəlirlərinin böyük hissəsini məhz rəqəmsal aktivlərdən əldə etdiyini göstərir. Bu sahədəki gəlirlərin artmasına onun administrasiyasının həyata keçirdiyi siyasətin də müsbət təsir göstərdiyi bildirilir.
Məlumata görə, Donald Trampın kriptovalyuta sektorundakı fəaliyyəti onun şəxsi sərvətinin son iki ildə kəskin artmasının əsas səbəblərindən biri olub.
Qiymətləndirmələrə əsasən, Trampın sərvəti 2024–2026-cı illər ərzində təxminən üç dəfə artaraq 2,3 milyard ABŞ dollarından 6,5 milyard ABŞ dollarına yüksəlib.
Bundan başqa, Donald Tramp "World Liberty Financial" və onun rəqəmsal valyutasından əldə etdiyi gəlirlərlə yanaşı, kriptovalyuta sektorunda fəaliyyət göstərən və fond birjasında listinqdə olan şirkətlərdə sahib olduğu səhmlər hesabına da milyonlarla dollar gəlir qazanıb.
Bu şirkətlər arasında ABŞ-ın tanınmış rəqəmsal aktiv ticarət platformalarından biri olan "Coinbase" də yer alır.
