BAKI,VOA, Fərid Mikayılov
ABŞ, Kanada və Meksikanın birgə ev sahibliyi etdiyi 2026-cı il FIFA Dünya Çempionatı zamanı müxtəlif ölkələrin azarkeşləri tribunlarda və fan zonalarında Fələstinə dəstək aksiyaları keçiriblər.
VOA xəbər verir ki, turnirin müxtəlif oyunlarında azarkeşlər Fələstin bayraqları qaldırıb, Fələstinə dəstək şüarları səsləndirib və İsrailə qarşı etiraz xarakterli çağırışlar ediblər.
Türkiyə millisinin D qrupunda ABŞ üzərində 3:2 hesablı qələbə qazandığı qarşılaşmada da qapıarxası tribunada Fələstin bayrağı nümayiş etdirilib və oyun boyu azarkeşlərin diqqət mərkəzində olub.
Almaniya–Paraqvay oyununda tribunaya gələn bir ailə Fələstin bayraqları qaldırıb. ABŞ vətəndaşlığına malik fələstinli azarkeşlərdən biri jurnalistlərə açıqlamasında dünya çempionatı boyunca Fələstinə dəstək nümayiş etdirməyə davam edəcəklərini bildirib.
Mərakeş azarkeşləri Braziliya və Niderlandla keçirilən oyunlar zamanı da Fələstin bayraqları qaldırıb. Oyundan əvvəl Nyu-Yorkun Tayms meydanında toplaşan azarkeşlər Fələstinə dəstək şüarları səsləndiriblər. Məlumata görə, həmin tədbir zamanı tribunaların yuxarı hissəsində bir nəfər İsrail bayrağı nümayiş etdirib və bu, gərginliyə səbəb olub.
Bosniya və Herseqovina–İsveçrə qarşılaşmasında da bəzi azarkeşlər Fələstin bayraqları qaldıraraq "Sarayevodan Fələstinə dəstək" yazılmış pankart nümayiş etdiriblər.
Qətər, Fransa və Braziliya yığmalarının oyunlarında da ayrı-ayrı azarkeşlərin Fələstin bayraqları açdığı bildirilib. Misir–İran oyunu öncəsi isə "Azadlıq heykəli" kostyumunda olan bir iştirakçı Fələstin və Livan bayraqları ilə hər iki ölkəyə dəstək mesajı verib.
Qeyd edək ki, nə Fələstin, nə də İsrail 2026-cı il FIFA Dünya Çempionatının final mərhələsinə vəsiqə qazana bilməyib.
