İndoneziya və Sinqapur Malakka boğazının açıq qalacağını bəyan edib

İndoneziya və Sinqapur Malakka boğazının bütün ölkələr üçün açıq qalacağını bəyan ediblər. Ölkə rəhbərləri boğazın beynəlxalq dəniz nəqliyyatı üçün mühüm əhəmiyyət daşıdığını vurğulayıblar. İndoneziya bu məsələdə Malayziya və Tailandla əməkdaşlığı davam etdirəcəyini açıqlayıb. Sinqapur isə dənizdə sərbəst hərəkət prinsipinə sadiq olduğunu bildirib. Açıqlama İranın Hörmüz boğazından keçən gəmilər üçün ödəniş tətbiq ediləcəyinə dair bəyanatından sonra verilib. Hörmüz boğazı qlobal enerji ticarətinin əsas marşrutlarından biri hesab olunur. Bu səbəbdən bölgədə baş verən dəyişikliklər beynəlxalq daşımalar üçün xüsusi əhəmiyyət daşıyır. Mütəxəssislər vəziyyətin enerji bazarlarına təsirini diqqətlə izləyirlər.

6 İyul 2026 19:03

BAKI,VOA,Yusif Şərifzadə

İndoneziya və Sinqapur Malakka boğazının bütün ölkələr üçün təhlükəsiz, açıq və maneəsiz dəniz yolu olaraq qalacağını bəyan ediblər.

VOA xəbər verir ki, İndoneziya Prezidenti Prabovo Subianto Cakartada Lorens Vonq ilə keçirdiyi görüşdən sonra bildirib ki, hər iki ölkə Malakka boğazının sərbəst gəmiçilik marşrutu kimi qorunmasında maraqlıdır. Onun sözlərinə görə, bu istiqamətdə Malayziya və Tailand ilə koordinasiya davam etdiriləcək.

Lorens Vonq isə qeyd edib ki, Sinqapur və İndoneziya Birləşmiş Millətlər Təşkilatının Dəniz Hüququ Konvensiyasına uyğun olaraq dənizdə sərbəst hərəkət prinsipinə sadiqdir.

Bu açıqlama İranın Çindəki səfirinin Hörmüz boğazından keçən gəmilərdən ödəniş alınacağını bildirməsindən sonra səsləndirilib. Səfir dost ölkələrin bu məsələdə xüsusi güzəştlərdən yararlana biləcəyini qeyd edib. Hörmüz boğazı vasitəsilə dünya üzrə ixrac olunan xam neftin və mayeləşdirilmiş təbii qazın təxminən 20 faizi daşınır.