BAKI,VOA,Yusif Şərifzadə
ABŞ Prezidenti Donald Tramp ABŞ-ın Hörmüz boğazında İrana qarşı blokadanı yenidən tətbiq etdiyini və gəmilərin təhlükəsiz keçidi üçün ödəniş tələb ediləcəyini açıqlayıb.
VOA xəbər verir ki, Donald Tramp sosial media hesabında ABŞ-ın bundan sonra “Hörmüz boğazının qoruyucusu” kimi tanınacağını yazıb. O bildirib ki, ABŞ bu strateji su yolunda təhlükəsizliyin təmin edilməsi üçün çəkilən xərclərə görə kompensasiya almalıdır.
Tramp qeyd edib ki, təhlükəsiz keçid təmin edilən bütün yüklərə görə 20 faiz həcmində ödəniş alınacaq. Onun sözlərinə görə, bu mexanizmin yaradılması və tətbiqi prosesi dərhal başlayacaq.
ABŞ Prezidenti Hörmüz boğazının “çox həssas və dəyişkən bölgə” olduğunu vurğulayaraq, təhlükəsizlik tədbirlərinin həyata keçirilməsi üçün maliyyə məsuliyyətinin bölüşdürülməsinin vacib olduğunu bildirib.
Hörmüz boğazı dünya enerji daşımalarının əsas marşrutlarından biri hesab olunur. Bu ərazidə yaranan hər hansı məhdudiyyət və ya gərginlik beynəlxalq ticarətə və enerji bazarlarına ciddi təsir göstərə bilər.
Trampın açıqlaması ABŞ və İran arasında strateji su yolu ilə bağlı qarşıdurmanın artdığı bir dövrə təsadüf edir. İran tərəfi isə daha əvvəl ABŞ-ın Hörmüz boğazına müdaxiləsinə qarşı çıxacağını bildirib.
