BAKI,VOA,Yusif Şərifzadə
ABŞ senatoru Kris Mörfi Prezident Donald Trampın İrana qarşı siyasətini tənqid edərək, Vaşinqtonun mövcud vəziyyətdən çıxış yolu tapmaqda çətinlik çəkdiyini bildirib.
VOA xəbər verir ki, Konnektikut ştatından olan demokrat senator Kris Mörfi sosial şəbəkədəki paylaşımında Donald Trampın İranla bağlı son addımlarını qiymətləndirib.
Mörfi bildirib ki, Trampın hazırda hər hansı razılaşmaya nail olmaq üçün aydın yolu yoxdur və ABŞ-ın son hərbi addımlarına yanaşmasını “ağılsızlıq” kimi qiymətləndirib.
Senator qeyd edib ki, İranın sərt mövqedə olan qüvvələri daha çox təsir əldə edib və Tehran böyük ehtimalla nüvə proqramı ilə bağlı ciddi razılaşmaya getməyəcək, həmçinin Hörmüz boğazına nəzarətdən imtina etməyəcək.
Kris Mörfi vəziyyəti “tam fəlakət” adlandıraraq, ABŞ siyasətinin ölkəni çətin vəziyyətə saldığını bildirib.
Demokrat senator ABŞ-İsrailin İrana qarşı həyata keçirdiyi hərbi əməliyyatların əsas tənqidçilərindən biri kimi tanınır.
Mörfinin açıqlaması ABŞ-da İran siyasəti ilə bağlı siyasi mübahisələrin davam etdiyi bir vaxtda səslənib.
