BAKI,VOA,Yusif Şərifzadə
ABŞ Prezidenti Donald Tramp süni intellekt məlumat mərkəzlərinin sürətlə artan enerji tələbatının adi istehlakçıların elektrik xərclərinə təsir göstərməsinin qarşısını almaq məqsədilə yeni təşəbbüs elan etməyə hazırlaşır.
VOA xəbər verir ki, cümə axşamı açıqlanacaq təşəbbüs ştat qubernatorları, qanunvericilər, enerji şirkətləri və məlumat mərkəzləri tikən şirkətlər tərəfindən dəstəklənir. Sənəd ABŞ-ın süni intellekt sahəsində qlobal liderliyini gücləndirmək strategiyasının tərkib hissəsi kimi təqdim olunur.
Yeni təşəbbüs bu ilin mart ayında irəli sürülmüş "Elektrik istehlakçılarının müdafiəsi öhdəliyi"nin genişləndirilmiş variantıdır. Sənədə əsasən, məlumat mərkəzlərini inşa edən və onlardan istifadə edən şirkətlər adi tariflərdən əlavə ödəniş etməli olacaq ki, artan enerji xərcləri ev təsərrüfatlarının üzərinə qoyulmasın.
Ağ Evin məlumatına görə, təqdimat mərasimində ABŞ-ın energetika naziri Kris Rayt, Ətraf Mühitin Mühafizəsi Agentliyinin rəhbəri Li Zeldin və təşəbbüsü dəstəkləyən bir sıra ştat qubernatorları da iştirak edəcəklər.
Bununla yanaşı, mütəxəssislər bildirirlər ki, məlumat mərkəzlərinin artan enerji tələbatı fonunda elektrik istehlakçılarının qorunması asan olmayacaq. ABŞ-ın regional elektrik şəbəkələri artıq ciddi yüklənmə ilə üzləşir.
Məlumata görə, 67 milyon nəfərə xidmət göstərən ölkənin ən böyük regional elektrik şəbəkələrindən biri olan PJM Interconnection sistemində ötürücü xətlərdə sıxlıq səbəbindən yaranan xərclər 2025-ci ildə 81 faiz artaraq 3,2 milyard dollara çatıb.
Ötən həftə PJM sistemində keçirilən illik enerji hərracında elektrik qiymətləri rekord səviyyəyə yüksəlib. ABŞ Federal Enerji Tənzimləmə Komissiyası (FERC) isə cümə axşamı keçiriləcək iclasında PJM şəbəkəsində təklif və tələbat arasındakı balanssızlığı müzakirə edəcək.
