Netanyahu Ağ Evdə Tramp ilə görüşə başlayıb

İsrailin Baş naziri Benyamin Netanyahu Ağ Evdə Donald Tramp ilə görüşə başlayıb. Bu, İranla müharibənin başlanmasından sonra liderlərin ilk görüşüdür. Danışıqlarda İran, Livandakı vəziyyət və "Hizbullah"ın silahsızlaşdırılması məsələlərinin müzakirəsi gözlənilir. Netanyahu Vaşinqtona siyasi təzyiqlərin artdığı bir vaxtda səfər edib. ABŞ və İran isə paralel olaraq sülh danışıqlarını bərpa ediblər. Görüşün nəticələri barədə hələlik rəsmi məlumat açıqlanmayıb. Regional təhlükəsizlik məsələləri əsas gündəlik mövzular sırasındadır.

28 İyul 2026 20:27

BAKI,VOA,Yusif Şərifzadə

İsrailin Baş naziri Benyamin Netanyahu ABŞ Prezidenti Donald Tramp ilə görüşmək üçün Ağ Evə gəlib. Liderlərin Oval kabinetdə qapalı formatda keçiriləcək görüşündə Yaxın Şərqdəki son vəziyyətin əsas müzakirə mövzusu olacağı gözlənilir.

VOA xəbər verir ki, bu, ABŞ və İsrailin fevralın 28-də İranla müharibəyə başlamasından sonra Donald Tramp və Benyamin Netanyahu arasında keçirilən ilk görüşdür. Məlumata görə, danışıqlarda İranla bağlı vəziyyətlə yanaşı, İsrailin Livandakı hərbi əməliyyatları və "Hizbullah"ın silahsızlaşdırılması məsələləri də müzakirə olunacaq.

Netanyahunun Vaşinqton səfəri onun həm ölkə daxilində, həm də beynəlxalq aləmdə artan tənqidlər fonunda baş tutur. Eyni zamanda, son aylarda ABŞ Prezidenti Donald Tramp ilə münasibətlərində gərginliyin yarandığı barədə məlumatlar yayılıb.

ABŞ və İran arasında qarşılıqlı hərbi zərbələrin müvəqqəti dayandırılması və sülh danışıqlarının yenidən başlaması da görüşün keçirildiyi dövrə təsadüf edir.

Ağ Ev görüşün nəticələri və qəbul edilən qərarlarla bağlı hələlik əlavə açıqlama verməyib.