BAKI,VOA, Fərid Mikayılov

İran yaxın həftələrdə Çindən ilk partiya daşınan hava hücumundan müdafiə sistemlərini qəbul etməyə hazırlaşır.

VOA xəbər verir ki, təxminən 60-70 milyon ABŞ dolları dəyərində qiymətləndirilən müqavilə İranın qısa mənzilli hava hücumundan müdafiə imkanlarını gücləndirmək istiqamətində son dövrlərdə atdığı ən iri addımlardan biri hesab olunur.

Bildirilir ki, bu qərar ABŞ və İsrailin İrana qarşı hərbi əməliyyatları zamanı ölkənin kritik infrastrukturunu və hərbi bazalarını qorumaqda üzə çıxan zəifliklərdən sonra qəbul edilib.

Müqavilə çərçivəsində 300-400 ədəd daşınan zenit-raket kompleksi (MANPADS) alınacaq. Söhbət əsasən Çində istehsal olunan QW-12 və FN-16 tipli raket sistemlərindən gedir.

Mənbələrin bildirdiyinə görə, müqavilə Honq-Konqda yerləşən Zhongqing Baoshang International Investment şirkəti vasitəsilə rəsmiləşdirilib. Şirkətin İran rəsmiləri ilə Çin müdafiə sənayesi istehsalçıları arasında vasitəçi rolunu oynadığı qeyd olunur.

Rəsmi Tehran və Pekin isə hələlik bu məlumatla bağlı açıqlama verməyib.