BAKI,VOA,Yusif Şərifzadə

İsrail ordusunun Baş Qərargah rəisi Eyal Zamir ölkəsinin müxtəlif cəbhələrdə davam edən hərbi əməliyyatlarının hələ başa çatmadığını və ordunun istənilən ssenariyə hazır olduğunu bəyan edib.

VOA xəbər verir ki, Eyal Zamir işğal altındakı Cənubi Livan ərazisinə səfəri zamanı zabitlərlə görüşdə çıxış edərək bildirib ki, İsrail ordusu bütün cəbhələr üzrə əməliyyatların davam etməsinə hazırdır.

"Bir neçə cəbhədə aparılan hərbi əməliyyatlar hələ başa çatmayıb və siz onların davam etməsinə hazır olmalısınız. Biz vəziyyətin istənilən dəyişməsinə və müxtəlif ssenarilərə hazırıq", – deyə Zamir bildirib.

Baş Qərargah rəisi əlavə edib ki, zərurət yaranacağı təqdirdə İsrail qüvvələri Livan cəbhəsində daha dərinə irəliləyəcək və əlavə ərazilərə nəzarəti ələ keçirəcək.

İsrail qüvvələri atəşkəs qüvvədə olsa da, Cənubi Livandakı bir sıra mövqelərdə hərbi mövcudluğunu davam etdirir və vaxtaşırı hava zərbələri endirir. Bu arada, "Hizbullah"ın tərksilah olunması və İsrail qoşunlarının Livan ərazisindən tam çıxarılması ilə bağlı danışıqlar davam edir.

Livan hökuməti və "Hizbullah" Zamirin son açıqlamalarına hələlik rəsmi münasibət bildirməyiblər.