BAKI,VOA Orxan Qədirzadə
Meksikanın Zakatekas ştatında körpüdən asılmış 5 meyitin aşkarlanması bölgədə narkokartellər arasında qarşıdurmanın yenidən güclənməsi ilə bağlı narahatlıqları artırıb.
Hadisə iyulun 18-də təxminən 5 min nəfərin yaşadığı Pozo de Qambua qəsəbəsində baş verib. Sakinlər səhər saatlarında körpüdən asılmış 5 meyit aşkarlayıblar. Həmin gün qəsəbənin müxtəlif ərazilərində daha 5 meyit tapılıb.
Ölənlər arasında keçmiş bələdiyyə rəhbəri, dövlət qulluqçuları və ştatın digər bölgələrindən olan iş adamlarının olduğu bildirilir. Hadisə uzun müddət narkotiklə əlaqəli zorakılığın hökm sürdüyü Zakatekasda vəziyyətin yenidən gərginləşməsi ilə bağlı ciddi narahatlıq yaradıb.
Narkotik marşrutlarının üzərində yerləşən ştat
Zakatekas Meksikanın mərkəzi, şimalı və qərbi arasında mühüm nəqliyyat bağlantısı hesab olunur. Ştatdan narkotiklərin ABŞ bazarlarına daşınmasında istifadə edilən əsas marşrutlardan biri keçir.
Təxminən 1,6 milyon insanın yaşadığı bölgə uzun illər narkokartellər arasındakı mübarizə, qətllər və insanların itkin düşməsi ilə üzləşib.
Bununla belə, son illərdə zorakılıq səviyyəsində ciddi azalma müşahidə olunmuşdu. Rəsmi məlumatlara görə, ştatda qətllərin sayı 2022-ci ildə təxminən 1 300 olduğu halda, 2025-ci ildə 144-ə düşüb. Hakimiyyət bu azalmanı yerli və federal hüquq-mühafizə orqanları arasında koordinasiyanın yaxşılaşması ilə əlaqələndirib.
Lakin Pozo de Qambua hadisəsi bu nisbi sakitliyin kövrək olduğunu göstərib. Məlumata görə, “Jalisco New Generation” və “Sinaloa” kartelləri Zakatekas üzərində nəzarət uğrunda mübarizə aparır.
Sakinlər gecələr küçəyə çıxmır
Hadisədən sonra yerli sakinlər arasında qorxu güclənib. Sakinlər bildirirlər ki, qəsəbədə bir çox ailə narkotik zorakılığı nəticəsində yaxınını itirib və ya itkin düşən şəxslərlə bağlı məlumat alıb.
Yerli sakinlərdən biri təhlükəsizliyi səbəbindən adının açıqlanmasını istəməyərək qəsəbəni “kabus şəhəri”nə bənzədib. Onun sözlərinə görə, əvvəllər gec saatlara qədər insanların olduğu küçələr hazırda axşam saat 21:00-dan sonra demək olar ki, boşalır.
Meksika prokurorluğu hadisə ilə bağlı araşdırmaya başlayıb. Zakatekas hökuməti isə sərt tədbirlər görüləcəyini açıqlayıb və bölgədə təhlükəsizliyin gücləndirilməsi üçün ordu və Milli Qvardiyadan dəstək istəyib.
Körpüdən asılan meyitlər – kartellərin qorxu mesajı
Körpünün daha əvvəl də narkokartellər tərəfindən rəqiblərinə təhdid mesajları göndərmək üçün istifadə edildiyi bildirilir. Bu səbəbdən hadisə yalnız qətl kimi deyil, həm də kartellər arasında güc nümayişi və əhalini qorxutmağa hesablanmış mesaj kimi qiymətləndirilir.
Hadisə 2006-cı ildən sonra Meksikada narkotiklərlə mübarizə çərçivəsində federal qüvvələrin səfərbər edilməsindən sonra geniş yayılan zorakılıq görüntülərini yenidən gündəmə gətirib.
Prezident Klaudia Şeynbaum hadisəyə görə məsul şəxslərin müəyyənləşdirilərək həbs olunacağını vəd edib. ABŞ Prezidenti Donald Trampın da Meksika hökumətinə narkokartellərə qarşı mübarizəni gücləndirmək və narkotiklərin ABŞ-a axınının qarşısını almaq üçün təzyiq göstərdiyi bildirilir.
