BAKI,VOA, Fərid Mikayılov
ABŞ Prezidenti Donald Trampın Yaxın Şərq üzrə nümayəndəsi və kürəkəni Cared Kuşner bazar ertəsi İsrailin Baş naziri Benyamin Netanyahu ilə görüşüb.
VOA xəbər verir ki, görüş Netanyahunun Qəzza zolağında atəşkəs razılaşmasının irəlilədilməsi üçün ABŞ tərəfindən təklif olunan 15 bəndlik planı qəbul etməməsindən sonra baş tutub.
Görüşdə ABŞ-ın Qəzzada münaqişənin dayandırılması ilə bağlı təşəbbüsü, bölgənin gələcəyi və İsrail ordusunun ərazidən çıxarılması məsələlərinin müzakirə edildiyi bildirilir.
Agentliyin məlumatına görə, prosesin nəticəsi təxminən 2 milyon fələstinlinin taleyi, dağıdılmış Qəzzanın bərpası və ərazi üzərində gələcək idarəetmə məsələləri baxımından mühüm əhəmiyyət daşıyır.
Xatırladaq ki, ABŞ Prezidenti Donald Tramp tərəfindən yaradılan Sülh Şurası daha əvvəl Qəzza zolağında münaqişənin başa çatdırılması üçün 15 bənddən ibarət geniş plan təqdim edib.
Plana əsasən, Fələstin silahlı qruplaşmalarının mərhələli şəkildə tərksilah edilməsi, Qəzzanın idarəçiliyinin Milli İdarəetmə Komitəsinə verilməsi və İsrail qoşunlarının ərazidən çıxarılması nəzərdə tutulur.
