BAKI,VOA, Fərid Mikayılov
ABŞ Prezidenti Donald Tramp İranla gərginliyin davam etdiyi Hörmüz boğazında ABŞ-nin fəaliyyətinə mane olacağı təqdirdə Omanın bombalanacağını bildirib.
VOA xəbər verir ki, Tramp bu fikirləri “Foks Nyus” telekanalının müxbiri Trey Yanqstla müsahibəsində səsləndirib.
Müxbirin Trampdan Omanın ABŞ-nin Hörmüz boğazındakı fəaliyyətinə müdaxilə etməsi halında Vaşinqtonun hansı addımı atacağını soruşduğunu bildirən Yanqst ABŞ prezidentinin belə cavab verdiyini qeyd edib:
“Əgər Oman qarşımıza çıxarsa, onları ağır şəkildə bombalayarıq”.
Tramp həmçinin İran İslam İnqilabı Keşikçiləri Korpusunun rəsmiləri ilə gizli əlaqə kanallarının olduğunu bildirib.
ABŞ prezidenti İranın əlində ABŞ istehsalı sursatların yalnız “kiçik bir hissəsinin” istifadə edildiyini iddia edib. O, Tehranın orta səviyyəli çoxsaylı silahlara malik olduğunu deyərək, keçmiş ABŞ prezidenti Co Baydenin daha inkişaf etmiş sistemləri Ukraynaya verdiyini bildirib.
İranla əldə olunan razılaşmanın müddətinin başa çatması məsələsinə toxunan Tramp Tehran rəhbərliyinin “təslim olmalı olduğunu” deyib.
“Buna tələsmirəm”, – deyə ABŞ prezidenti əlavə edib.
Tramp ABŞ-nin İrana tətbiq etdiyi dəniz blokadasının iqtisadi təzyiq yaratdığını bildirərək, Tehranı bu məsələdə “blef etməkdə” ittiham edib.
Qəzza və İsrail seçkiləri
Tramp İsraildə oktyabr ayında keçirilməsi planlaşdırılan seçkilərə də münasibət bildirib.
“Mənim İsrail seçkilərindən kənarda qalmağım ən düzgün variantdır, lakin namizədlərdən birini dəstəkləyə bilərəm”, – deyə o bildirib.
ABŞ prezidenti HƏMAS ilə müxtəlif kanallar vasitəsilə əlaqələrin davam etdiyini də açıqlayıb. Onun sözlərinə görə, HƏMAS “silahı yerə qoyacaq”.
Tramp eyni zamanda İsrailin Qəzzaya hücum etməməli olduğunu bildirib.
