BAKI,VOA Orxan Qədirzadə
ABŞ Beynəlxalq Cinayət Məhkəməsinin (BCM) yaponiyalı sədri Tomoko Akane və baş prokuror müavini Abdullah Se-yə qarşı sanksiya tətbiq edib.
Yaponiya Vaşinqtonun qərarını “çox təəssüf doğuran” addım kimi qiymətləndirib. Tokio BCM-ni beynəlxalq hüququn aliliyinin qorunmasında dəstəklədiyini bildirib.
ABŞ-ın sanksiyaları Akane və Se-nin ölkə daxilindəki vəsaitlərinin və maliyyə maraqlarının dondurulmasını, həmçinin ABŞ maliyyə sistemi üzərindən onlarla maliyyə və kommersiya əməliyyatlarının qadağan edilməsini nəzərdə tutur.
Vaşinqton BCM rəsmilərini ABŞ və məhkəmənin yurisdiksiyasını qəbul etməyən müttəfiq ölkələrin vətəndaşlarına qarşı səlahiyyətlərini aşmaqda ittiham edir. Dövlət katibi Marko Rubio məhkəməni “siyasi” və “korrupsiyaya uğramış” qurum adlandırıb.
BCM isə sanksiyaları beynəlxalq məhkəmənin müstəqilliyinə təhdid kimi qiymətləndirərək onların hüququn aliliyini zəiflətdiyini açıqlayıb. Niderland da məhkəmə əməkdaşlarına qarşı tətbiq olunan tədbirlərə etiraz edib.
İsrail isə ABŞ-ın qərarını alqışlayıb. Baş nazir Benyamin Netanyahu BCM-nin İsrail rəsmilərinə, o cümlədən özü və keçmiş müdafiə naziri Yoav Qallanta qarşı həbs qərarlarından sonra Vaşinqtonun mövqeyini dəstəkləyib.
BCM 1998-ci ildə Roma Statutu ilə yaradılıb və 2002-ci ildən fəaliyyət göstərir. Məhkəmə soyqırımı, müharibə cinayətləri və insanlıq əleyhinə cinayətlərdə ittiham olunan şəxsləri mühakimə edir.
