BAKI,VOA Orxan Qədirzadə
Aişə Vahab Kaliforniyanın 14-cü seçki dairəsi üzrə keçirilən əlavə seçkidə qalib gələrək ABŞ Nümayəndələr Palatasında mandat qazanan ilk əfqanıstan əsilli amerikalı olub.
Vahab rəqibi, Körfəz bölgəsinin sürətli nəqliyyat qurumunun rəhbəri Melissa Ernandesə qalib gəlib. O, 2027-ci ilin yanvarında başa çatacaq seçki müddətinin qalan hissəsində Kaliforniyanın 14-cü dairəsini Nümayəndələr Palatasında təmsil edəcək.
Seçkidən sonra açıqlama verən Vahab uşaqlığını keçirdiyi dairə üçün mübarizə aparacağını bildirib. O, himayədarlıq sistemindən Konqresə qədər uzanan siyasi yolunun “Amerika arzusunun mümkünlüyünü” göstərdiyini deyib.
Məlumata görə, seçki kampaniyasında xarici qrupların maliyyə dəstəyi mühüm rol oynayıb. Federal seçki məlumatlarına əsasən, iyulun ortalarından etibarən müxtəlif xarici qruplar kampaniyalara ümumilikdə təxminən 4,1 milyon dollar xərcləyib. Bu vəsaitin 3,7 milyon dolları Ernandesin dəstəklənməsinə, təxminən 400 min dolları isə Vahabın kampaniyasına yönəldilib.
Aişə Vahab 2018-ci ildə Hayvard Şəhər Şurasına seçilərək ABŞ-da dövlət vəzifəsinə seçilən ilk əfqanıstan əsilli amerikalı kimi tarixə düşüb.
14-cü seçki dairəsində əlavə seçki əvvəlki konqresmen Erik Suonvelin istefasından sonra keçirilib. Suonvel Kaliforniya qubernatorluğu uğrunda kampaniya dövründə ona qarşı irəli sürülən zorakılıq və cinsi təqib ittihamlarından sonra apreldə vəzifəsindən istefa verib. O, ittihamları rədd edir.
