BAKI,VOA Orxan Qədirzadə
ABŞ Prezidenti Donald Trampın Miçiqan ştatında Demokratlar Partiyasının Senat seçkiləri üzrə praymerizini qazanan ərəb əsilli namizəd Əbdürrəhman əs-Seyyidlə bağlı paylaşımı ölkədə siyasi və ictimai mübahisələrə səbəb olub. Tramp “Truth Social” platformasında öz həyat yoldaşı Melaniya Trampla olan fotosu ilə Əbdürrəhman əs-Seyyidin hicablı həyat yoldaşı Sara ilə fotosunu yan-yana paylaşaraq “İki tamamilə fərqli Amerika” ifadəsini yazıb.
Paylaşım Trampın tərəfdarları tərəfindən dəstəklənsə də, bir sıra fəallar müqayisənin dini və xarici görünüş üzərindən ayrı-seçkilik yaratdığını bildiriblər.
Tənqidçilərin fikrincə, ailələrin xarici görünüşünün və dini mənsubiyyətinin “əsl Amerika” anlayışı ilə əlaqələndirilməsi ölkədəki müxtəlif həyat tərzlərini siyasi qarşıdurma vasitəsinə çevirmək cəhdidir.
Əs-Seyyid və Trampın ailələri fərqli həyat hekayələrini təmsil edir
Tənqidçilər bildiriblər ki, Tramp və Əs-Seyyidin həyat hekayələri ABŞ cəmiyyətində uğurun fərqli nümunələrini göstərir və onlardan birinin digərindən üstün təqdim edilməsi düzgün deyil.
80 yaşlı Donald Tramp daşınmaz əmlak biznesi ilə məşğul olub və Pensilvaniya Universitetinin Uorton məktəbində iqtisadiyyat üzrə təhsil alıb. Sloveniyada doğulan Melaniya Tramp isə uzun illər model kimi fəaliyyət göstərib.
41 yaşlı Əbdürrəhman əs-Seyyid həkimdir. O, Kolumbiya Universitetində tibb təhsili alıb, Oksford Universitetində fəlsəfə doktoru elmi dərəcəsi əldə edib və epidemiologiya üzrə ixtisaslaşıb. Onun həyat yoldaşı Sara da psixiatr həkim kimi çalışır.
Tənqidçilər bu iki ailənin “Amerika arzusu”nun fərqli nümunələrini əks etdirdiyini və onların dini və mədəni fərqlərinin seçki mübarizəsində qarşıdurma yaratmaq üçün istifadə edilməməli olduğunu vurğulayıblar.
Trampın paylaşımı niyə müzakirə olunur?
Sosial şəbəkələrdə bəzi istifadəçilər Trampın Əs-Seyyidi xüsusi olaraq hədəfə almasının səbəblərini sorğulayıblar. Onların fikrincə, ərəb və müsəlman kimliyinə malik, yüksək akademik və tibbi təhsilə sahib siyasətçinin ABŞ siyasi səhnəsində yüksəlişi mühafizəkar elektoratın miqrasiya və İslamla bağlı narahatlıqlarından siyasi məqsədlərlə istifadə edilməsinə şərait yarada bilər.
Digər fəallar isə “iki fərqli Amerika” müzakirəsinin insanların görünüşü və dini inancları üzərindən deyil, siyasət və qanunlar üzərindən aparılmalı olduğunu bildiriblər.
Onların fikrincə, konstitusiyaya və hüququn aliliyinə əsaslanan ABŞ həm dindar, həm də dünyəvi ailələrin hüquqlarını eyni şəkildə qorumalıdır.
Tramp tərəfdarları paylaşımı müdafiə edib
Trampın tərəfdarları isə paylaşımın məzmununu müdafiə edərək onun miqrasiya və milli təhlükəsizlik məsələlərini yenidən gündəmə gətirdiyini bildiriblər.
Daha mülayim tərəfdarlar qanuni və təhlükəsiz miqrasiya siyasətinin həyata keçirilməsini, sərhədlərin qorunmasını və fərdi risklərin ciddi yoxlanılmasını müdafiə ediblər.
Daha sərt mövqe tutan Tramp tərəfdarları isə müsəlman ölkələrinə tətbiq edilən səyahət məhdudiyyətlərinin daimi şəkildə bərpa olunmasına çağırıblar.
Beləliklə, Trampın qısa sosial media paylaşımı ABŞ-da miqrasiya, dini azadlıqlar, milli kimlik və seçki siyasəti ətrafında mövcud fikir ayrılıqlarını yenidən gündəmə gətirib.
