Yəmən Silahlı Qüvvələri ötən gün husilərə qarşı hərbi əməliyyatların miqyasını bir neçə cəbhə boyu genişləndirib. Husilərin başlatdığı hərbi eskalasiyanın beşinci günündə qeydə alınan bu nəzərəçarpacaq taktiki dönüşlə hökumət qüvvələri müdafiə və həmlələrin qarşısının alınması mərhələsindən qruplaşmanı təqib etmək və yeni əraziləri azad etmək fazasına keçib.
ArabAZ xəbər verir ki, ən mühüm irəliləyiş Cəvf vilayətində qeydə alınıb. Hökumət qüvvələri vilayətin azad edilməsi məqsədilə genişmiqyaslı hərbi əməliyyata başlayıb. Hücum nəticəsində strateji əl-Ləbnət hərbi bazası, onun ətraf əraziləri və əl-Həzm şəhərinin şərqində yerləşən bir sıra digər yüksəkliklər Tehranın dəstəklədiyi husilərdən təmizlənib. Cəbhədən daxil olan məlumatlarda husilərin sıralarında kütləvi qaçışların baş verdiyi və xeyli sayda silahlı yaraqlının əsir götürüldüyü bildirilir.
Bununla yanaşı, ordu qüvvələri əl-Beyda vilayətində yeni cəbhə xətti açıb. Əz-Zahir cəbhəsində həyata keçirilən xüsusi əməliyyat zamanı Heyd əl-Xəzzan və əl-Füleyhan yüksəklikləri azad edilib, bölmələr ən-Nasifə bölgəsi istiqamətində irəliləyişi davam etdiriblər. Bu istiqamətdə də qruplaşma sıralarında sürətli geri çəkilmələr müşahidə olunur.
Bu proseslər Qərb sahili və Taiz cəbhələrində - xüsusən əl-Bərh, Məqbənə, Suqm və əl-Kədhə istiqamətlərində şiddətli toqquşmaların davam etdiyi vaxta təsadüf edib. Hərbi mənbələrin verdiyi məlumata görə, həmin ərazilərdəki toqquşmalarda da husilər onlarla ölü və yaralı itkisi veriblər.
