BAKI,VOA, Fərid Mikayılov
Rusiyanın elektron ticarət şirkəti “Ozon”un Orenburq və Ufa şəhərlərində yerləşən iki logistika mərkəzi pilotsuz uçuş aparatlarının hücumuna məruz qalıb. Hadisə avqustun 27-nə keçən gecə baş verib.
VOA xəbər verir ki, şirkətin açıqlamasına əsasən, hücum zamanı hər iki müəssisədə çalışan əməkdaşlar operativ şəkildə təxliyə edilib. İlkin məlumata görə, xəsarət alan olmayıb.
Şirkət hücumlardan sonra obyektlərdə yanğın baş vermədiyini bildirib. Orenburqdakı logistika mərkəzi artıq fəaliyyətini bərpa edib.
Ufadakı logistika mərkəzinə isə cüzi ziyan dəyib. Təhlükəsizlik baxımından ərazinin ətraflı yoxlanılması məqsədilə mərkəzin fəaliyyəti müvəqqəti dayandırılıb.
“Ozon”un logistika infrastrukturu son günlərdə də pilotsuz uçuş aparatlarının hücumlarına məruz qalıb. Avqustun 22-dən 24-dək şirkətin Rusiyadakı bir neçə logistika obyektinin hədəfə alındığı bildirilmişdi.
