Bakı, VOA
Hindistanın paytaxtı Yeni Dehlidə şiddətli istilər səbəbindən 9 gündə 192 evsiz insanın öldüyü açıqlanıb.
VOA xəbər verir ki, “India Today” qəzetinin məlumatına görə, Centre for Holistic Development (Bütüncül İnkişaf Mərkəzi) qeyri-hökumət təşkilatı 11-19 iyun tarixləri arasında şiddətli istilər nəticəsində ölən evsiz insanlar haqqında hesabat dərc edib.
Məlumata görə, paytaxt Yeni Dehlidə 9 gündə 192 evsiz insan həyatını itirib. Bu, son 6 ildə ən çox evsizlərin şiddətli istilər səbəbindən öldüyü dövr olub.
Qeyd edək ki, paytaxt Yeni Dehlidə 11-19 iyun tarixləri arasında 2023-cü ildə 75, 2022-ci ildə 150, 2021-ci ildə 58, 2020-ci ildə 124, 2019-cu ildə 143 evsiz şiddətli istilər səbəbindən həyatını itirmişdi.
Bütüncül İnkişaf Mərkəzinin direktoru Sunil Kumar Aledia açıqlamasında bildirib ki, bu həyəcanverici statistika cəmiyyətin ən həssas qrupu olan evsiz insanlar üçün təcili şəkildə effektiv tədbirlərin görülməli olduğunu göstərir.
Aledia havanın çirklənməsi, sürətli sənayeləşmə, şəhərləşmə və meşələrin qırılmasının temperaturu artırdığına diqqət çəkərək, bu vəziyyətin evsizlərin vəziyyətini daha da pisləşdirdiyini qeyd edib.
Hindistan Səhiyyə Nazirliyinin məlumatına görə, martın 1-dən iyunun 18-dək ölkə daxilində şiddətli istilər səbəbindən 40 min 272 günvurma halı qeydə alınıb. ki, bunların 457-si iyunun 18-də baş verib.
Onu da əlavə edək ki, Hindistanda hər il mart ayında havalar isinməyə başlayır və həddindən artıq istilər səbəbindən çoxlu insan ölür. Bütün zamanların ən yüksək temperaturu isə mayın 29-da paytaxt Yeni Dehlidə 52,9 dərəcə ilə qeydə alınıb.
Ümumdünya Meteorologiya Təşkilatı (WMO) qlobal temperaturun artmasına səbəb olan "El Nino" hava fenomeninin sona çatma əlamətlərini göstərdiyini və bu ilin sonlarına doğru planetində sərinliyi qoruyan "La Nina" hava şəraitinə geri qayıdacağının ehtimal edildiyini bildirib.
WMO El Nino ilə bağlı dərc etdiyi hesabatda, "keçən ildən təsirli olan və bütün dünyada qlobal temperaturun artmasına və ekstremal hava şəraitinə səbəb olan El Nino artıq sona çatma əlamətlərini göstərir”-deyə qeyd olunub. Həmçinin hesabatda, bu ilin iyul-sentyabr dövründə La Ninanın müşahidə edilmə ehtimalının 60% olaraq təxmin edildiyi bildirilib.
Hesabatda fikirləri yer alan WMO Baş Katibinin müavini Ko Barrett “2023-cü ilin iyun ayından etibarən hər ay yeni temperatur rekordu yaşanıb və 2023-cü il indiyə qədər qeydə alınan ən isti il olub.”- deyə əlavə edib.
El Nino effektinin sona çatmasının "uzun müddətli iqlim dəyişikliyində fasilə" mənasına gəlmədiyinə diqqət çəkən Barret, planetin istixana qazları səbəbiylə istiləşməyə davam edəcəyini qeyd edib.
"Növbəti aylarda dəniz səthinin qeyri-adi dərəcədə yüksək temperaturu müşahidə olunacaq. Atmosferimizdəki əlavə istilik və rütubət səbəbindən hava şəraitimiz daha çətin olmağa davam edəcək. Bu səbəbdən "hamı üçün ilkin xəbərdarlıqlar" Ümumdünya Meteorologiya Təşkilatı əsas prioriteti olaraq qalır."-deyə Barrett əlavə edib.
